Lima2019News

5 lugar pa Kamilah y Thashaina

Duo femenino lo mester prepara pa e singles

Bolicheronan Kamilah Dammers-Naddall y Thashaina Seruas a keda na un di 5 lugar overall

Despues di a caba na un di 4 lugar riba e prome dia di competencia den e double femenino den e Weganan Panamericano Lima 2019, e bolicheronan Kamilah y Thashaina a cuminsa e segundo y ultimo buelta pa mira si nan lo logra termina mas halto riba e tabla di posicion. Mester bisa cu e duo di Aruba a conoce un start slow pero a recupera bon sigur den e wega 4 unda a recupera e di 4 lugar bek. Drentando den e ultimo rond Aruba tabata na di 5 lugar cu 7 pin tras di Puerto Rico.

Den e di 6 y ultimo wega, Thashaina y Kamilah a lucha bon pero esaki no tabata suficiente mirando cu no tabata tin e consistencia den nan weganan. Mester bisa cu e duo di Aruba a baha un puesto y keda na di 5 lugar overall den e standing final tras di Merca, Mexico, Republica Dominicana y Puerto Rico. Aruba ta caba cu un total di 4944 cu Kamilah un averahe di 204.7 y Thashaina un averahe di 207.4.

Awor ambos atleta lo mester prepara nan mes pa e weganan den singles cu lo inicia majan diasabra den oranan di atardi. Mester bisa cu den dos dia Thashaina y Kamilah lo hunga 12 wega y aki e miho ochonan lo sigui pa e round robin cual lo mira cua ta e cuaternan cu lo sigui pa e gran final. E cuater atletanan di final lo ricibi medaya cual 3 y 4 e medaya di Brons.

Exito na Thashaina y Kamilah.

Tags

Related Articles

Close