Aruba Amateur Weightlifting Association tabata huesped di atletanan di Pesas for di Ecuador
Na Aruba tabatin 8 atleta di Ecuador cu ta presente p un campo di entrenamento cu a inicia desde 18 di januari y cu a termina ayera 16 februari.
Tres di e atleta nan ta e ruman nan Dajomes, di cual Neisi Dajomes ta campeon olimpico na Tokyo. Angie Dajomes ta campeon mundial, campeon Panamericano y Suramericano. Nan ruman chikito Jessica Dajomes ta campeon U-17 di Weganan Hubenil na Rosario, Argentina.
E entrenamento ta parti di nan programa dirigi pa e siguiente competencia nan en busca di e clasificacion pa Paris 2024. Na mes momento pa nos atletanan local tambe esaki ta un estimulo pa por entrena cu atletanan cu un experiencia amplio den competencia internacional.
Comite Olimpico Arubano ta desea e atletanan local como tambe di Ecuador tur clase di exito den e siguiente competencia nan.
