Buki Conmemorativo 46 atleta Olimpico Arubano
A celebra un bunita ceremonia na Surfside Marina
Comite Olimpico Arubano a presenta nan buki conmemorativo di e 46 atletanan Olimpico Arubano
Durante un bunita ceremonia celebra na Aruba Surfside Marina, Comite Olimpico Arubano a lansa e buki conmemorativo na honor di tur e atletanan Arubano cu den pasado a representa nos dushi isla den Weganan Olimpico desde 1952. Presente na e anochi aki nos por a mira e Olimpians, e directiva y direccionnan di COA, Minister di Salubridad Publico, Turismo y Deporte Sr. Danqui Oduber, representante di Asociacion Arubano di Atletanan Olimpico (AAAO), federacionnan miembro di COA y invitadonan di honor.
E autor di e buki, Sr. Jossy Tromp a conta riba e idea con a bini na e buki aki cu a hiba hopi preparacion prome cu a yega na e concepto final. E historia di e buki ta papia pa su mes, e experencia cu cada atleta a biba ta simplemente excepcional. Ser un atleta Olimpico ta un titulo cu tiki por carga. Palabranan di elogio no ta suficiente pa loke tur e atletanan aki significa pa Aruba.
Na final presidente di COA, Roy Mezas hunto cu e autor Jossy Tromp y Olimpian Willem Maduro(Montreal 1976) den presencia di Minister Oduber a bautisa e buki conmemorativo na honor di nos atletanan Olimpico.
Un palabra di pabien grandi na tur cu di un of otro manera a contribui cu e magnifico evento aki.
Photo Credit: COA/Seever Krozendijk – Noel Werleman
