Lima2019News

Ceremonia Apertura

Weganan Panamericano Lima2019 a cuminsa

Mahestuoso Ceremonia di Apertura di e Weganan Panamericano LIMA 2019

Diabierna anochi den e Estadio Nacional di Peru, e fiesta deportivo di e continente America a keda oficialmente inaugura cu e di 18 edicion di e Weganan Panamericano celebra na e ciudad di Lima, Peru. Presente por a mira e Prome mandatario di Peru, Martin Vizcarra como tambe presidente Thomas Bach di Comite Olimpico Internacional y presidente Nevin Illic di Panam Sports.
A habri e ceremonia unda a hisa e bandera y a toka e himno di e pais anfitrion, Peru. Despues a sigui cu diferente show tipico di e historia impresionante di e pais, un show colorido, hopi bunita hinka den otro cu un coreografia di baile simplemente spectacular.

A sigui cu e desfile di tur e paisnan participando na e Weganan Panamericano LIMA 2019 cu e pais di Argentina como e prome nan pa marcha y drenta e stadion nacional. E delegacion di Aruba cu nos abanderado, e medayista di Oro di e Weganan CAC Barranquilla 2018, e atleta di Vela, Mack van den Eerenbeemt a marcha como pais number tres. E delegacion di Aruba a bisti un outfit deportivo cu e colornan tradicional simbolisando e colornan di nos bandera. Mas cu claro manera tradicion y bou grito y aplauso, e pais anfitrion Peru a drenta como e ultimonan den e stadion cu delegacion enorme.

A hisa e bandera di Panam Sports y Comite Olimpico Internacional pa despues scucha e discurso di dignitarionan di e Comision Organisador, Panam Sports y di e pais Peru cu presidente Viscarra habriendo oficial e Weganan Panamericano LIMA 2019.

Por ultimo legendario Cecilia Tahit di volleyball haya e honor pa cende e pebetero cu e antorcha. Mester bisa cu e recorido di antorcha na Peru a inicia na e historico y mundialmente famoso Machu Picchu unda a recore un total di 23 ciudad den Peru durante 23 dia pa un total di 5,500 kilometer prome esaki a yega e stadion nacional di Peru na Lima pa e Ceremonia di Apertura. A clausura e anochi cu e presentacion di e cantante Puertoriqueño Luis Fonsi. Mas di 400 miyon hende rond mundo a mira e ceremonia di apertura.

Di 25 di juli pa 11 di augustus un total di 6.680 atleta di henter e continente America lo competi den 493 evento deportivo den 39 diferente deporte na e Weganan Panamericano LIMA 2019.

Tags

Related Articles

Close