Buenos Aires 2018News

Ceremonia di despedida pa e Delegacion Hubenil

Nan ta cla pa sali pa e Weganan Hubenil Buenos Aires 2018

Dialuna anochi den e Frank Conway room di Casa del Mar Beach Resort Aruba, Comite Olimpico Arubano (COA) a tene un anochi ameno y masha special, unda a celebra e ceremonia di despedida di e delegacion hubenil cu dia 2 di oktober proximo lo sali pa e Weganan Olimpico Hubenil cu lo tuma lugar na Buenos Aires, Argentina. Na e ocasion aki tabata presente, seis di e shete atletanan y e coachnan, miembronan di directiva di COA, e diferente comisionnan di COA, mayornan, federacionnan, invitadonan special y miembronan di Prensa.

Presidente di COA, Sr. Roy Mezas y Secretaria General di COA y Sra. Nicole Hoevertsz a dirigi algun palabra na esnan presente unda a splica riba e experencia y importancia cu e weganan lo ta pa nos delegacion. Ta bon pa menciona cu pa prome biaha e Weganan Olimpico Hubenil lo ser teni den e continente America pues un momento historico di esnan cu lo forma parti di esaki. E impacto sin duda lo ta uno grandisimo riba bida di cada atleta cu lo recorda pa semper e bunita momentonan. Manera a ser bisa mirando e nivel halto di competencia, esaki no lo bay ta facil pero cu motivacion, determinacion y e disciplina cu cada atleta a demostra durante nan preparacion no tin duda cu nos atletanan lo briya na dicho weganan. A lo largo ta e 7 miho atletanan hubenil lo representa Aruba, mei mei di e mihor 4000 atletanan hubenil di e 206 paisnan participando na e Youth Olympic Games.

Team Aruba ta consisti di e landado Anahi Schreuders, e tenista Patrick Sydow, e tri-atleta Giannon Eights, e duo femenino di beach volleyball Kayla Arends y Mali Rafiniy e duo masculino di beach volleyball, Raibiently Mercalina y Brian Howell.

Hefe di Mision, Kenneth Vrolijk a duna informacion general di e biahe di e delegacion y e reglanan cu mester tene cuenta durante di e dos siman y mei na Buenos Aires. Por ultimo, e atleta di Beach Volleyball, Kayla Arends a wordo nombra como abanderado, e lo bira e persona cu lo carga e bandera di nos pais durante e ceremonia di apertura di e Weganan Olimpico Hubenil na Buenos Aires, Argentina. Durante di ceremonia di traspaso Presidente di COA, Sr. Roy Mezas a otroga e bandera di Aruba na hefe di mision, Sr. Kenneth Vrolijk cu na su turno a pasa esaki na e abanderado atleta Kayla Arends di beach volleyball.

E famia grandi di Comite Olimpico Arubano y Aruba completo ta desea cada un di e integrantenan di e delegacion pa e Weganan Olimpico Hubenil tur clase di exito y lo sigui nan pasonan di cerca, manteniendo pueblo di Aruba na haltura na tur momento.

Photo Credit: COA/Seever Krozendijk

Tags

Related Articles

Close