ASU, COA, IBISA y SSA a reuni cu Crisisteam

Diabierna mainta, den un setting cu a demostra union entre instancianan deportivo ASU, COA, IBISA, SSA, a tuma lugar un reunion (virtual) cu Sra. Sharline Koolman di Crisis Team tocante e deseo grandi cu ta reina den comunidad u bou di e organisacionnan deporrivo pa re-anuda e practica y competencianan di deporte na Aruba.

E instancianan di deporte a trece diferente observacion na atencion di Sra. Koolman. Di parti di Sra. Koolman a duna splicacion di e maneho pa cu e pandemia, e situacion actual, e motibo pakiko a tuma cierto decision.

E instancianan a splica cu nan ta representa federacionnan, clubnan y un gran cantidad di atleta, cu ta practica deporte na un forma organisa (deporte federativo).

E asina yama “deporte organisa” aki tin comprension pa e reglanan di gobierno c.q. Crisis Team y ta desea di aporta cu conseho y sosten pa asina e decisionnan wordo tuma a base di informacion correcto y completo.

Tur e participantenan na e reunion a expresa nan satisfaccion pa cu e reunion. Ta spera di por sigui comunica cu otro den futuro, loke sigur lo ta den beneficio di e mundo di deporte.