News

Comite Olimpico Arubano a presenta nan relato anual 2018

COA a tene su Asamblea General den e ballroom di Holiday Inn Hotel

Dos biaha pa aña e federacionnan deportivo miembro di Comite Olimpico Arubano ta reuni den loke ta e Asamblea General. Diahuebs ultimo den un bon atmosfera, COA a tene su Asamblea General den e ballroom di Holiday Inn Hotel pa trata e relatonan di aña 2018.
Den marco di e asamblea directiva di e asociacion a ricibi aprobacion di parti di su miembronan pa e rumbo cu ta hibando e organisacion y deporte na Aruba. Prome a presenta e “Pin Panamericano” cu a keda masha bunita mes. E pin ta ilustra e simbolo di e weganan LIMA 2019, e famoso Machu Pichu hunto cu e emblema di COA. Mester bisa cu un total di 17 di e 24 federacion deportivo afilia na COA a haci acto di presencia na dicho asamblea.

E biaha aki e prestacion di e relato di actividad a bay diferente unda un “presentacion visual” a keda mustra na e federacionnan miembro, resumiendo e resultadonan principal cu a logra na 2018.
Loke a resalta den e presentacion ta e magnifico logronan di nos atletanan den e diferente weganan grandi atendi den 2018. Tambe pa prome biaha den historia di COA a tene un eleccion pa un directiva di Comision di Atleta cu ta encabesa pa e ex-atleta elite di artistic swimming mr. Amanda Maduro. Cu e eleccion di Comision di Atleta, presidente di e comision tin un lugar den e directiva di COA.
Nos atletanan a presta grandemente den 2018 si nos mira tur e logronan den e tres weganan importante bishita. Na Cochabamba nos atletanan ta logra 1 medaya di Plata (Joel Kuiperi) y 2 medaya di Bronz (Thashaina Seraus). Na Barranquilla/Cali nos atletanan a logra un total di 9 medaya, incluyendo 2 medaya di Oro, 1 medaya di Plata y 6 medaya di Brons. Ultimo a participa na e Weganan Olimpico Hubenil, Buenos Aires 2018 y aki nos atletanan a haci un papel den beach volleyball femenino y masculino, den triathlon y tennis.

Na final e resumen di e actividadnan di aña 2018 a wordo aproba unanimamente pa e sala cu un aplauso fuerte.

Representante di e compania Ernst and Young, sra. Conny Mardenborough hunto cu tesorero di COA, sr. Edwin Roos a repasa e relato funanciero (cuenta anual) di aña 2018 cual na final e sala a aproba unanimamente tambe.

Despues Directiva a intercambia informacion interesante tocante varios tema actual, pa asina e federacionnan por ta debidamente informa. Intencion ta pa sigui cu e formato aki, hasiendo e asamblea mas interesante, dinamico y interactivo pa e miembronan.

Por bisa cu e desaroyo di e Deporte na Aruba ta uno positivo y riba e bon caminda, sigur si nos mira e cantidad grandi di atletanan cu ta bayendo e Weganan Panamericano Lima 2019. Un total di 20 atleta a clasifica pa dicho weganan.

Comite Olimpico Arubano y tur su 24 federacionnan miembro tin e intencion di sigui traha duro y cu dedicacion, pa asina deporte logra mehora mucho mas ainda.

Tags

Related Articles

Close