NewsOlympic News

Comite Olimpico Arubano a reuni cu Minister Dangui Oduber

Comite Olimpico Arubano a reuni cu Su Excelencia Minister di Salubridad, Turismo y Deporte, Dangui Oduber.

Awe diamars atardi tabata un dia grandi pa Comite Olimpico Arubano mirando e hecho cu COA a haya a oportunidad di reuni cu Minister di Deporte, Sr. Dangui Oduber riba e ultimo desaroyo rond di nos atletanan local y e deporte di Aruba engeneral. Tanto Presidente di COA, Sr. Roy Mezas Secretaria General di COA, Sra. Nicole Hoevertsz, y segundo Secretario General, Sr. Menno Vinck, tabata masha satisfecho con e reunion cu Minister Oduber a transcuri.

E dirigentenan di COA a comparti informacion tocante varios tema cu ta di interes pa e Minister. Preparacion di e atletanan pa Weganan deportivo naturalmente a haya amplio atencion, pero tambe e forma con COA ta selecta atletanan, e obhetivonan cu ta desea di logra pa cada edicion di e Weganan na cua lo participa y tambe e desaroyo riba termino mas largo cu ya caba ta den pleno ehecucion.

E necesidad di por conta cu e financiamento necesario pa yuda e atletanan den nan preparacion ta un otro tema cu COA ta duna hopi atencion y ta hasi tambe cu mester implementa un plan di mercadeo pa deporte. Un sede propio, adecuado y representativo pa COA y – preferiblemente – tur su Federacionnan miembro lo bira un punto cu lo analisa den futuro encuentronan, den un firme intento di hasi esaki factible.

Pa logra exito den deporte ta importante pa e instancianan traha den harmonia cu otro y esey ta loke tanto Minister Dangui Oduber como COA ta desea. A palabra di mantene e linea di comunicacion habri, reuniendo y discutiendo temanan di interes pa deporte regularmente.

Presidente di COA, Roy Mezas, a gradici Minister Oduber pa e encuentro positivo, cu sigur ta pone un base constructivo pa futuro.

 

 

Related Articles

Close