News

COC y COA a formalisa e deseo pa sigui colabora

Un acuerdo di cooperacion a ser firma entre COC y COA

Pa varios aña na nivel di e organisacionnan Olimpico di Colombia y Aruba tin un relacion di amistad y apoyo, di cua COA sigur ta siña y beneficia hopi. Colombia ta entre e paisnan di mayor nivel den deporte, cu ta logra exito y resultadonan importante durante encuentronan deportivo.

Te cu awor e colaboracion entre Colombia y Aruba no tabata basa riba un acuerdo formal, pero mas bien un expresion di e relacionnan di amistad cu ta existi entre e dirigentenan. Ta hustamente pa duna expresion na e aprecio y respet cu ta existi, COC y COA a dicidi di formalisa e deseo pa sigui colabora, pa defini e terenonan riba cua lo busca un cooperacion y pa habri posibilidad pa tin un intercambio di conocimento y experticio, di cua e Comitenan Olimpico y nan miembronan lo por beneficia.

E Acuerdo di Cooperacion a wordo firma pa Presidente y Secretario General di Comite Olimpico Colombiano, Ciro Solano y Ana Edurne Camacho, di Comite Olimpico Arubano, Wanda Broeksema y Nicole Hoevertsz, den presencia como Testigo, Presidente anterior di COC, Baltazar Medina, cu tabata instrumental pa a inicia e proceso aki, cu awe a culmina cu firmamento di e Acuerdo di Cooperacion aki.

 

E acto historico a tuma lugar na Santiago de Chile, den marco di e Asamblea General di PanAm Sports, caminda e 41 Comite Olimpico Nacional di e continente ta presente pa debati temanan di interes comun. Esaki tabata un excelente ocasion pa seya e cooperacion entre Comite Olimpico Colombiano y Comite Olimpico Arubano.

Related Articles

Back to top button