Buenos Aires 2018News

Duo di Beach Volleyball Masculino no a logra victoria

Comienso a cuminsa bon pero a laga e partido bai

E duo di Raibiently Mercalina y Brian Howell no a logra saca un victoria ayera den nan ultimo wega contra e duo di Merca aki na Buenos Aires, Argentina. Apesar cu na comienso di tur dos set nos hungadornan a wanta e wega bon tog na final nan ta laga bay. Den tur dos set Aruba tabata cabes cabes cu Merca, dado momento a hasta anota 5 punto tras di otro pa sera e gap, pero cada bes no por a wanta e wega. Mester bisa cu e blokeo di Aruba no tabata uno stabil unda e balanan a bin cu velocidad den direccion di Howell cu no por a wanta esakinan. Kizas e falta di keda concentra y keda hunga consistente y sin lubida e experencia tabata factornan cu a hunga un rol den tur wega. Aruba ta perde den dos set cu e scorenan di 21 – 15 y 21 – 13.

Apesar di no a logra victoria no tin duda cu den e duo Raibiently y Brian, Aruba su beach volleyball tin futuro. Pa e tiki tempo cu na tin hunto ta entrena y hunga y e hecho cu nan a clasifica pa e Weganan Olimpico Hubenil ta bisa tur cos di nan nivel. Aki dos aña nan lo ta mucho mas leu si nan keda hunto. Ambos hungador lo mester hunga mas torneo, mas weganan di fogeo, ect pa un mihor rendimento.

Pabien na Raibiently, Brain y coach Elmerlindo pa e prestacion na Buenos Aires.

Tags

Related Articles

Close