Lima2019News

Hillard Cijntje a competi den ciclismo di pista

Hillard ta caba na di 13 lugar overall

Hillard Cijntje a competi den ciclismo di pista den e Weganan Panamericano LIMA 2019

E ciclista di Corsow, Hillard Cijntje a haci su debut pa Aruba den e Weganan Panamericano LIMA 2019. Ciclista Cijntje pa prome biaha ta competi bou bandera di Aruba y core den e modalidad di Omnium den e mahestuoso y moderno Velodrome na Lima, Peru. Mester bisa cu Cijntje a hiba un preparacion den exterior mientras e la entrena na Aruba pa varios luna bou guia di coach Aldrick Maduro. Cijntje tin tiki experiencia riba pista unda e la competi tres biaha so anteriormente pero nunca riba e nivel Panamericano cual ta uno grandi cu ta conta cu varios medayista Mundial, CAC, Panam y Olimpico.

EVENTO MERDIA
Cijntje a subi pista 12.08 ora di Peru contra un field cu varios nomber cu tin un trjactoria largo y impresionante den e deporte aki. E 14 ciclistanan di diferente pais di e continente America mester a core e scratch pa un total di 10.000 meter(10km) cu tabata 40 lap riba e pista di e Velodromo. Mester bisa cu e careda a cuminsa riba un velocidad hopi halto, e ciclista Cijntje a bay bon cu henter e grupo sigur e prome 30 lapnan pero despues e velocidad y pace a subi enorme y aki Cijntje a cay atras for di e grupo. A lo largo Cijntje ta caba na di 12 lugar cu 18 punto y a cay 1 lap atras for di e prome lugar.

Den su di dos start, Hillard Cijntje mester a core e Omnium Tempo Race cu ta 40 lap(10km) contra e mesun field di 14 coredor. E biaha aki e tabata un poco mas pisa unda ciclista Cijntje a sali na un di 14 lugar. Cu a resultado aki Hillard Cijntje a caba na un di 13 lugar overall cu 32 punto den e dos eventonan cori den oranan di merdia.

EVENTO ATARDI
Den oranan di atardi Hillard Cijntje a bolbe mira accion den e careda di pista unda e mester a competi den e Omnium Elimacion final. Aki e ciclista Cijntje a logra su mihor resultado unda e la caba na di 10 lugar y a acomula 22 punto pa un total di 54 punto.

Den e careda di final cual tabata e Omnium Carera por puntos finales, lamentablemente Cijntje a haya un DNF.

Den e posicion final Hillard Cijntje ta caba na di 13 lugar overall.

EXPERENCIA y GRADICIMENTO
Pa un prome biaha sigur e ciclista Hillard Cijntje por ta satisfecho cu su prestacion, mirando cu e la wanta bon e dos e caredanan aki. E experencia tabata unico ya cu ni na Aruba, ni na Corsow no tin pista Velodromo. Kizas esaki ta algo cu por pensa riba dje den futuro sercano. Hillard Cijntje ta gradici COA, Coach Aldrick y tur hende cu a dune e oportunidad unico aki pa asina e por a representa Aruba. E ta sinti su mes Arubiano ya cu varios biaha e la core na Aruba pues tin hopi amistad na Aruba y hendenan conoce su habilidad.

Durante e Weganan Panamericano por a competi den e modalidadnan di Velocidad, Keiri, Ómnium, Velocidad pa ekipo, Persecucion pa ekipo equipos y Madison, tur esaki den Ciclismo di Pista, pa muher y homber.

PROXIMO EVENTO
E proximo evento pa Hillard Cijntje lo ta 7 di augustus proximo unda e lo competi prome den e Careda contra Holoshi mientras dia 10 di augustus, Cijntje lo culmina cu e Road Race.

Tags

Related Articles

Close