Apertura di e Weganan Olimpico 2012

Apertura Londres 2012 1Magnifico y colorido tabata e Ceremonia di Apertura di e Weganan Olimpico di Londres 2012

27-07-2012- “Drentando e stadion ta carga nos bandera, hendenan den stadion ta bati man pa bo delegacion, gritando Aruba su nomber, esey tabata e sentimento mas grandi cu uno por a experiencia den su bida, un sentimento di orguyo pa te atleta cu a carga nos bandera durante di un Wega Olimpico”, esaki ta loke nos abanderado Jemal Le Grand a

expresa ora a puntre con el a sinti e momento di drenta e stadion Olimpico durante di e Ceremonia di Apertura. Un sentimento cu pa henter e resto di delegacion ta uno cu hamas y nunca lo por ser lubida y cu lo keda recorda den cada curazon.

Diabierna pa 9 or di anochi ora di Inglatera, mundo henter tabata en espera di e evento deportivo mas grandi celebra riba e planeta aki cu ta e Weganan Olimpico. Porfin despues di un preparacion intenso di shete aña, Londres y su hendenan tabata cla pa ricibi e mas cu 10.000 atleta di e 204 Comité Olimpico Nacional participante. Ya for di tempran tur e delegacionnan a prepara nan mes pa e desfile, cu nos representantenan di Aruba den e fila number diescuater. E ceremonia di apertura a tuma lugar den e mahestuoso Stadion Olimpico nobo di Londres, porcierto ubica algun shen meter leu di e Villa Olimpico. E paisnan participante a hasi nan presentacion oficial dilanti di un publico grandisimo di mas di 80.000 espectador y un publico televidente di alrededor di 4 biyon hende rond mundo!

E ceremonia di apertura a conoce su momentonan protocolario, cu e hisamento di e bandera di Comite Olimpico Internacional y e presentacion di e himnonan di Inglatera y esun Olimpico. A huramenta un atleta, un oficial y – pa prome biaha – un coach, tambe por a scucha diferente dignitario hiba palabra manera Presidente di e Comité Organizador di e Weganan Olimpico, Lord Sebastian Coe, Presidente di IOC, Jacques Rogge. Su Mahestad Reina Elizabeth II tabata tin e honor di declara e Weganan Olimpico di London oficialmente inaugura. Finalmente e momento supremo tabata ora cu a sende e pebetero, e candela Olimpico, cu lo keda briya te na final di e weganan. Ta bon pa menciona cu e delegacion di Aruba a ricibi bon comentario di su trahe di desfile, palabranan di elogio so tabata tin pa nos delegacion cu a luci den su trahe oficial consistiendo di un bunita bachi cora cu su carson y sapato beige y un sombre cabana cu logo di COA y Aruba scribi riba dje. E uniform di e delegación Arubano a wordo diseña pa señora Magali Maduro.

E legendario artista ingles, Paul Mc Cartny di ex- Beatles a culmina e ceremonia cu un presentacion di e famoso canción “Hey Jude”, cu a ser canta pa tur presente den stadion. Na final, e show di fuego artificial a ilumina henter e area di e Parke y Villa Olimpico, dunando asina e inicio oficial di e Weganan Olimpico di Londres 2012.

gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1  

Copyright © by Comite Olimpico Arubano. All rights reserved.