Jemal Le Grand a logra mehora su record personal den e Weganan Olimpico

Jemal Le Grand 22012-07-31. Diamars mainta e segundo atleta di Aruba a mira accion durante di e Weganan Olimpico di Londres 2012. E landador Jemal Le Grand a competi den e 100m liber. Mester bisa cu Jemal a inicia su competencia cu un tempo personal di 51.99 seconde. Apoya pa e delegacion di Aruba, Jemal a start den heat number 3 riba lane number 3 hunto cu ocho otro landador.

Jemal a cuminsa su careda bon, caminda na e prome birada di 50m ela marca un tempo di 24.77 seconde, bon pa e momento ey un di cuater lugar. Den e ultimo 50 meter, Jemal a mustra di lo remata bon, dado momento a mustra cu elo yega den e prome tres lugarnan, esaki faltando un 15 meter mas pa bai, pero na final Jemal a yega den un tempo di 51.86, bon pa un di cuater lugar. Remarcabel ta cu Jemal a logra mehora su record personal cu 0.13 sentesimo di seconde. Esaki ta nifica Jemal a cumpli cu su obhetivo pa e Weganan Olimpico, esta mehora su tempo personal. E atleta Jemal Le Grand apenas di 18 aña di edad y ainda e tin dos ciclo olimpico mas pa bai, si tur cos cana segun planificacion na 2016 y 2020,por spera mucho mas di e atleta Jemal Le Grand. Combersa cu Jemal ela bisa nos cu e ta sintie hopi bon mes, e ta contento cu el a logra su meta di drecha su tempo. Pa loke ta e careda, Jemal a conta nos cu tur cos tabata bayendo bon, pero e ultimo 15 meternan su brasanan tabata cansa, casi e no a sinti nan mes, mientras su pianan si tabata fit. Pero e ta super contento cu su tempo logra y cu e tabata un experiencia unico, landa den e Olimpiada di Londres. Un pabien grandi sigur pa Jemal Le Grand.

gallery1 gallery1 gallery1
gallery1 gallery1 gallery1
gallery1 gallery1 gallery1
gallery1 gallery1 gallery1

Copyright © by Comite Olimpico Arubano. All rights reserved.