Resumen di e Weganan Olimpico di Londres 2012

Olympic Moments (1)2012-08-22. E Weganan Olimpico di Londres 2012 ta tras di lomba. Weganan Olimpico cu a inicia cu un bunita ceremonia di apertura dia 27 di juli, unda cu mundo henter tabata en espera di dos siman y mei di competencianan na nivel mundial. Ya for di e prome dianan di competencia tabata bisto cu e paisnan cu lo lucha pa mas medaya tabata Merca y China, dos gigante den deporte mundial, dificil pa iguala nan prestacionnan, mientras cu e pais anfitrion Inglatera kier a demostra su nacion cu nan lo kibra e cantidad di medaya logra na e

Weganan Olimpico di 2008 na Beijing. Na final e pais Merca a logra e prome lugar cu 104 medaya logra, di cual 46 tabata di oro, 29 di plata y 29 di brons, China a keda na di segundo lugar y Inglatera na tercer lugar. Pa trece e momentonan mas memorable di e Weganan di Londres, nos tin cu bisa cu landamento, atletismo y ciclismo (pista) a "steal the show", unda cu den atletismo e atencion a bai pa e team di Jamaica, lidera pa 6 bez campeon den 100m, 200m y 4x100m di Beijing y awor tambe London, Usain Bolt. Pa Inglatera mes nos por a mira dos heroe nobo den Jessica Ennis, kende a gana oro den Heptathlon y Mo Farah kende a gana oro den 5.000m y 10.000m. Remarcabel ta cu e prestacion den atletismo di paisnan den e area di Caribe tabata sublime. Banda di Jamaica nos por nota e triunfonan di oro di Kirani James (Grenada) den 400m plano, e medaya di oro den 4x400m plano di Team Bahamas, e medaya di oro di Trinidad and Tobago den Javalina, sin lubida e medaya di brons den 4x100m plano di Team Trinidad and Tobago como tambe e medaya di plata pa Guatemala (e prome medaya Olimpico pa e pais aki!) den 25k Racewalk.

Den e velodromo, Inglatera a pone su nacion riba su cabez ora cu nan a gana casi tur medaya di oro, kibrando recordnan mundial un tras di otro, un prestacion cu pa anjanan largo lo keda papia riba dje. Den landamento e mericano Michael Phelps a demostra cu su cinco medayanan logra entre nan cuater di oro, cu e ta e atleta olimpico of "Olympian" mas grandi di tur tempo. Den tres edicion di e Weganan Olimpico, Michael Phelps a gana no menos cu 22 (!) medaya, entre nan 18 di oro.

Un momento sigur historico tabata e participacion di e atleta sur-africano Oscar Pistorius, miho conoci como “The Blade Runner”, un atleta cu no tin nigun di su dos pianan y a ser permiti pa competi den e Weganan Olimpico di Londres 2012. E coredor Pistorius a core riba dos pia artificial, esaki den e 400m plano den e deporte di atletismo.

Mas cu claro tur atleta participante lo kier a bai cu un of mas medaya cas, pero den Weganan Olimpico ta tiki atleta y pais ta logra esaki. E nivel di e atletanan cada anja ta bira mas halto y costoso. Esaki ta exigi un preparacion largo y profesional cu no tur pais por yega na dje, sigur no paisnan chikito menos afortuna. Si nos haci un analisis general di e paisnan cu a obtene medaya, nos tin cu bisa cu di e 204 pais participante, 79 a obtene por lo menos 1 medaya. E 125 restante no a logra haya medaya.

E nivel olimpico ta asina halto cu por ehempel paisnan super desaroya manera Spanja, Brasil, Canada, Mexico y Venezuela mes a termina abou den e tabla overall. Pa duna un ehempel:

PAIS PUESTO

Espana 21
Brasil 22
Suiza 33
Canada 36
Colombia 38
Mexico 39
Rep. Dominicana 46
Venezuela 50
Pto Rico 63
Guatemala 69

Si bo ta analisa e calidad di medaya :
Colombia 1 oro
Argentina 1 oro
Venezuela 1 oro
Canada 1 oro
Mexico 1 oro

E paisnan aki ta e paisnan mas grandi di nos continente. Cu excepcion di Brasil (3 oro-5 plata-9 brons) pa e otronan ta dificil pa haya mas di un medaya di oro.

Si nos wak e islanan nos tin Cuba na di 16 lugar cu 5 Oro-3 Plata-6 Brons, Jamaica na di 18 lugar cu 4 Oro- 4 Plata-4 Brons, Trinidad na di 47 lugar cu (1-0-3), Bahamas lugar 50 (1-0-0), Grenada lugar 50 (1-0-0)

Aki 4 anja lo ta e Weganan Olimpico na Rio de Janeiro, Brasil. Ban wak si e paisnan di Caribe por sigui duna bon resultado den atletismo, un Brasil cu despues di a hinka mas cu 150 miyon dollar pa cu e Weganan di Londres a keda descepciona y por saca mihor resultado den su propio cas. E gigantenan manera Merca y China sigur lo bini hopi fuerte un bez mas.

gallery1 gallery1 gallery1
gallery1 gallery1 gallery1

Copyright © by Comite Olimpico Arubano. All rights reserved.