Encuentro historico entre Comision di Subsidio y Comite Olimpico Arubano

IMG 8944Aruba, 15 Februari. Nunca antes e dos instancianan asina importante pa e mundo di deporte di nos pais a reuni cu otro. Diahuebs, riba Valentine's Day, Comision di Subsidio pa Deporte y Comite Olimpico Arubano a sinta na mesa pa intercambia informacion

tocante maneho di cada uno y con por coordina e maneho di ambos entidad mihor riba otro. Ganador di un proceso asina ta e federacionnan y particularmente e deportistanan Arubano.

COA a tuma iniciativa pa e reunion, mirando cu den seno di e organizacion y conhuntamente cu e federacionnan miembro ta trahando riba un planificacion strategico integral pa e proximo cuater añanan, esta e ciclo olimpico 2013-2016 Den esaki e aspectonan tecnico-deportivo ta crucial, specificamente e proceso di preparacion di atletanan y entrenadornan, pero naturalmente tambe e desaroyo general di e organizacionnan deportivo.

Pa e ciclo actual Comite Olimpico Arubano tin na su disposicion fondonan financiero adicional pa yuda hasi e plannan grandi cu ta existi realidad. Esaki ta posibel, danki na e apoyo cu COA ta ricibi for di su partnernan internacional, Comite Olimpico Internacional (IOC) y e Organizacion Deportiva Panamericana (ODEPA). Ta conoci tambe cu Ministro di Deporte, Dr. Richard Visser, tambe ta poniendo mas fondo disponibel pa deporte. Pa realmente ricibi e fondonan sinembargo, COA mester entrega un plan strategico pa e cuater añanan, loke desde comienso di e aña aki ta den proceso di preparacion, conhuntamente cu e federacionnan deportivo.

Comision di Subsidio y COA kier yega na un situacion den cua ta bon cla kiko e necesidadnan di e mundo di deporte ta y pa aloca e recursonan disponibel di tal forma cu tur e necesidadnan aki wordo cubri. Asina so por garantiza un desaroyo positivo di nos deporte.

Na final di e reunion e participantenan a constata cu e prome encuentro historico aki tabata uno sumamente positivo y cu en realidad ta existi un necesidad pa un comunicacion mas estrecho entre ambos organizacion. A palabra di lo programa mas reunion den futuro cercano, pa asina por profundisa e tema aki mas.
Un bon noticia pues pa e federacionnan deportivo y tambe pa e mundo di deporte en general.

gallery1 gallery1 gallery1
gallery1 gallery1 gallery1
gallery1 gallery1  

Copyright © by Comite Olimpico Arubano. All rights reserved.