Apertura Curso Basico pa Entrenador 2013

Curso BAsico (1)Diaranson ultimo, dia 20 di februari 2013, Comite Olimpico Arubano a duna inicio na su segundo Curso Basico pa Entrenadornan deportivo.

Considerando e interes grandi cu tabata existi pa e prome curso cu a tuma lugar den luna di september 2012 ultimo y cu mientrastanto a keda finalisa, COA a dicidi di ripiti e curso aki.

Pa falta di cupo, COA no por a cumpli cu tur e aplicacionnan ricibi den promer instante. COA a tuma e decision pa ripiti e curso aki y asina ofrece e oportunidad pa ainda por participa na e curso.

Sr Edwin Roos, tesorero di Comite Olimpico Arubano y sr Robert Falconi, director di Direccion Desaroyo di Comite Olimpico Arubano a jama tur e cursistanan un caluroso bon bini y a desea nan tur clase di exito. Tambe sr Edwin Roos, den nomber di Directiva. Staff y Personal di Comite Olimpico Arubano, a gradici sr Alberto Thiel, kende ta atrobe e docente encarga pa duna e curso aki.

E Curso Basico pa Entrenadornan por wordo considera como un promer stap pa futuro entrenadornan deportivo cu ta aspira pa bira un entrenador profesional pa di e forma aki contribui na sigui eleva e nivel di nos entrenadornan y deporte Arubano na general.

COA ta hopi satisfecho pa mira un grupo grandi di futuro entrenadornan cu a dicidi pa participa na e curso aki.

Esaki ta otro prueba cu deporte na Aruba tin su raíz profundo den nos comunidad y cu e interes pa sigui desaroye ta wordu garantisa ora nos mira e interes grandi cu tin entre nos potencial dirigentenan deportivo pa sigui desaroya nan mes como futuro entrenadornan deportivo.

Nan tin e tarea pa sigui motiva, entrena nos hobennan pa sigui practica deporte y di e forma aki sigui mehora nan habilidadnan deportivo pa asina un dia nan por representa nos país riba nivelnan mas halto, tanto nacional como internacional.
COA ta compromete su mes pa sigui aporta na e desaroyo positivo aki.

gallery1 gallery1 gallery1
gallery1 gallery1 gallery1
gallery1 gallery1 gallery1

Copyright © by Comite Olimpico Arubano. All rights reserved.