Trinta cursista entusiasma a cuminsa cu e Curso Basico pa Entrenadornan

IMG 0236Aruba, 27 Februari. Diasabra mainta tempran, trinta cursista entusiasma a registra pa asina cuminsa cu e curso Basico pa Entrenadornan organisa dor di e Direccion di Desaroyo di Comite Olimpico Arubano. E curso ta bou guia di docente y metodologo, Sr. Betto Thiel, miembro di e Comision Tecnico di COA.

E curso Basico pa Entrenadornan ta un iniciativa di e Direccion di Desaroyo di COA specialmente disena pa traha cu atleta y/of entrenador, cu no tin un grado di certificado ainda. Cu e curso aki nan por haya e informacion basico necesario con pa traha cu un atleta den e forma mas amplio y sigur planifica. For di un principio, e atleta lo haya un guia cu un cierto grado di nivel cual lo contribui despues na un bon desaroyo di e propio atleta.

Despues cu e grupo termina e curso basico, e oportunidad lo tey pa sigui uno mas avanza cu Comite Olimpico Arubano mes ta ofrece, por ehempel esun di nivel 123.

Durante e curso basico, e cursistanan lo pasa tres tesis final unda e promedio mester ta suficiente pa obtene un diploma. E curso ta consisti di ocho modulo, entre nan entrenamento deportivo, clasificacion general di entrenamento, proceso di preparacion deportivo, didactica di entrenamento, adaptacion di esfuerzonan humano, ehercicio fisico como medio di formacion deportivo, nutricion y factornan psicologico den e preparacion di un deportista.

Di parti di COA nos ta desea e trinta cursistanan hopi sabiduria y exito durante di e ocho simannan largo. Nos tin sigur cu mirando e entusiasmo cerca cada un di nan, na final Aruba lo conoce un otro grupo di entrenador di nivel pa traha cu nos atletanan.

gallery1 gallery1 gallery1
gallery1 gallery1 gallery1
gallery1   

Copyright © by Comite Olimpico Arubano. All rights reserved.