Curso Basico pa Entrenadornan di COA a yega su final

IMG 0535Aruba, 13 mei. E Curso Basico pa Entrenadornan, organisa pa Comision di Desaroyo di Comite Olimpico Arubano, a yega su final. E curso cu a inicia den luna di februari ultimo, a conoce un participacion di diesnuebe persona di cual diescinco a termina esaki exitosamente.

Den un evaluacion cortico, Sr. Betto Thiel a resumi con e curso a bai. Segun, Sr. Thiel e curso tabata riba un bon nivel y e cursistanan a siña hopi. A duna algun ehempel di loke a ser repasa durante di e tres lunanan di curso, aunke esaki ta un parti masha chikito mes.

E concepto di entrenamento tabata esun mas importante, esaki den e areanan deportivo, teoretico y practico.

E persona "entrenador" tambe a ser trata, aki a evalua por ehempel e conducta di un entrenador, e entrenador personal, e entrenador fisico di seleccion y e modelo di e personalidad di e entrenador.
Tambe a trata diferente otro topico, manera e condicion di bida, condicion hygienico, e custumber di e atleta, e bistimento deportivo, condicion di material, direccion di preparacion, control pedagogico, educacion, e cuatro pilar di educacion, pedagogia, pedagogia tecnologico, control medico, evaluacion di e mecanismo di un atleta, stretchmento, concepto y definicion didactica, condicion basico di siña y mucho mas.

Diahuebs 16 di mei pa 6:30, e Comision di Desaroyo di COA, lo haci entrega di e certificadonan na e cursistanan cu a finalisa e curso basico pa entrenadornan cu exito, esaki na Casa del Mar. Prome lo tin un charla interesante di un orador di origen Cubano, Cuco Pacheco cu ta trahando na Boyaca, Colombia. Notable ta cu tur cursista tin e oportunidad di inicia e curso pa entrenadornan di nivel 1,2 y 3, cu lo cuminsa pronto .

Esnan cu a finalisa e Curso Basico pa Entrenadornan mester a pasa den un proceso di tesis cu un cierto grado di dificultad. Nan mester a pasa tres examen cu exito pa nan por bin na remarke pa e certificado. Durante di un periodo di dos luna largo, dos ora riba diaranzon y cuater ora riba diasabra, e cursistanan a sacrifica esey pa por a logra nan tesis final.

gallery1 gallery1 gallery1
gallery1   

Copyright © by Comite Olimpico Arubano. All rights reserved.