DR. CUCO PACHECO A DUNA CHARLA RIBA PLANIFICACION DI ENTRENAMENTO Y PRONOSTICONAN DEPORTIVO

Certificado Curso Basico (15)

Aruba, 17 di mei. Diahuebs anochi e mundo di deporte di Aruba a duna un paso mas den e direccion di hisa e nivel di e deporte di alto rendimento. E Federacionnan deportivo y nan entrenadornan a ricibi cu gran honor e bishita di un experto di prestigio internacional, Dr. Abelardo "Cuco" Pacheco.


Ken ta Dr. Cuco Pacheco?

Hasiendo un breve resumen di e biografia di Dr. Cuco Pacheco, nos tin cu bisa cu e ta di origen cubano y den pasado e tambe tabata un deportista di taya mundial. Como deportista Dr. Pacheco a logra un record Centroamericano den Atletismo (bulamento leu), e tabata ademas miembro di e seleccion di basketball di Cuba, finalista den tres edicion di e Weganan Panamericano den Atletismo.

Su estudio riba nivel academico tabata uno impresionante. Dr. Pacheco ta gradua como den Derecho Diplomatico, den Ciencianan Pedagogico, Licenciado den Cultura Fisica. Tambe Dr. Cuco Pacheco a traha como consehero di e Ministronan di Deporte di Argentina, Venezuela, Namibia y actualmente Colombia. Pa loke ta e deporte mes su persona a ocupa posicionnan clave, entre otro e tabata Director Tecnico di Federacion di atletismo di Cuba, jefe di e grupo di pronosticonan deportivo di Cuba, preparador fisico di e Club Boca Junior di Argentina y especialista den Deporte di alto rendimento.

Tur esaki ta haci cu Dr. Cuco Pacheco ta un especialista di alto nivel cu gran prestigio y reconocimento internacional.

Charla na nos entrenadornan

Durante di su charla na nos entrenadornan, Dr. Cuco Pacheco a duna un splicacion amplio di e aspectonan di planificacion di entrenamento y pronosticonan deportivo na nos entrenadornan presente. Na cada splicacion a usa ehempelnan facil di cada deporte, pa asina tur hende presente por a compronde di loke a ser papia na e momento ey.

Dr. Cuco Pacheco a duna un presentacion den dos tema: na prome ta e Teoria y Planificacion di entrenamento deportivo. A destaca y ilustra e importancia di e planificacion pa logra resultadonan grandi den deporte. Manera nos a indica anteriormente cu e exposicion a bai acompaña cu ehempelnan di diferente deporte.

E asistentenan a keda impresiona cu e cantidad di informacion cu Cuco Pacheco a duna, demostrando un conocimento profundo di e materia den tur deporte. Nan a haci hopi pregunta y cada un a ricibi un contesta amplio di parti di Dr. Pacheco.

Un cos a keda bon defini durante di e charla aki: "No ta existi otra manera di logra resultadonan deportivo cu nos atletanan, sin un planificacion exacto di cada actividad y ehercicio fisico di parti di nan preparación," manera Dr. Pacheco a bisa.

E otro tema cu a ser trata tabata e pronosticonan deportivo. Den e mayoria di paisnan cu ta traha den ciclonan di 4 aña, ta necesario pa hasi un analisis di cada detaye di e preparacion pa asina crea e condicionnan pa logra loke bo ta spera. "Den e deporte moderno bo no por warda pa un cos por pasa si of no, bo tin cu planifica pa loke bo kier pa pasa" segun Pacheco.

Finalmente Cuco a duna un par di conseho na e cursistanan recien gradua y na nos entrenadornan cu mas experiencia, manera ela bisa “Boso mester studia cada dia mas y nunca pensa cu bosa tur cos pasobra esey ta un error grandi”.

Dr. Cuco Pacheco lo colabora cu e preparacion metodologico di e grupo di deporte cu ta den preparacion pa e Weganan Suramericano Hubenil na Lima, Peru, den luna di September proximo.

Tanto Comite Olimpico Arubano como e Federacionnan y entrenadornan ta hopi contento cu e bishita di un personalidad deportivo manera Dr. Cuco Pacheco. Mester gradici Comision di Subsidio kende a colabora y apoya pa Dr. Cuco Pacheco por bini Aruba.

gallery1 gallery1 gallery1
gallery1 gallery1 gallery1
gallery1   

Copyright © by Comite Olimpico Arubano. All rights reserved.