Comite Olimpico Arubano a reuni cu Federacionnan riba e Plan Strategico

IMG 5877Aruba, 9 mei. "No por yega na bon resultado, logrando medaya of titulo, sin tin un Plan Strategico, e palabra "suerte" no ta existi mas den e mundo deportivo, en todo caso no como base pa resultado".

Esaki secretaria general di COA, Sra. Nicole Hoevertsz a bisa diamars anochi durante di un reunion informativo cu COA a tene cu algun di su federacionnan deportivo riba e presentacion di e Plan Strategico.
E federacionan presente tabata esnan di Judo, Atletismo, Futbol, Beisbol, Tennis y Esgrima.

Na inicio di e reunion, Sra. Hoevertsz a splica cu e concepto di e Plan Strategico ta algo relativamente nobo den e mundo di deporte na Aruba. E organisacion di ODEPA pa e ciclo actual a pone extra fondonan disponibel pa e paisnan den region cu tin atletanan den preparacion pa e Weganan Panamerico di 2015 y e Weganan Olimpico di 2016. Cu esaki no solamente ODEPA kier pa e comitenan olimpico den nos region y nan atletanan ta miho posibel prepara pa dicho weganan, unda resultadonan prominente ta ser spera, pero tambe pa hisa e nivel y calidad di e deportenan cu lo participa.

Algun luna atras pa prome biaha den historia, COA y Comision di Subsidio a tene un reunion pa yega na un entendimento riba un miho structura y planificacion pa loke ta e fondonan disponibel pa nos federacionnan, cu otro palabra ambos organisacion lo yuda otro pa cubri y parti e gastonan pa nos atletanan. Esaki den un intento pa yuda cubri e necesidadnan financiero mihor ainda, di loke actualmente ta e caso.

Pa loke ta e plan di ODEPA, COA mester traha su propio plan strategico pa por bin na remarke pa haya ayudo financiero di ODEPA, y COA no por traha e plan aki sin input di e Federacionnan Deportivo. Manera ta conoci, COA riba su mes no ta prepara atleta, pero ta depende di e federacionnan pa esaki. COA ta yuda den un miho preparacion posibel di cada atleta, cu por ehempel asistencia tecnico, guia medico, consehonan, ect. E sincronizacion entre COA y e Federacionnan ta hopi importante den e proceso di preparacion di e atletanan pa entre otro e diferente weganan, cuminsando cu e Weganan Suramericano Hubenil, Weganan ODESUR, Weganan CAC, y e Youth Olimpic Games.

Sra. Hoevertsz a splica tambe e importancia di e concepto "autonomia" di cada organisacion deportivo. COA y tambe e federacionnan deportivo ta entidadnan priva, cu no ta cai bou di e structura di Gobierno, pero en cambio ta entidadnan di sector priva. Ta importante ta mantene un bon relacion cu gobierno y otro stakeholders y preferiblemente pa gobierno duna e apoyo necesario pa asina e organisacionnan deportivo por ehecuta nan plannan na un bon forma. Semper mester keda cuidadoso pa cada organisacion mantene su autonomia y ayudo financiero ta un aporte importante na esaki.

Por ultimo a duna un splicacion riba e punto mas importante di e Plan Strategico cu ta e proceso analitico, unda e federacionnan mester inicia un proceso di debate y "brainstorming"den su propio seno, pensando riba e rumbo di maneho cu cada un kier hiba. Pa cu esaki mester di un participacion di mas tanto hende involvi den e organisacion, esaki cuminsando na e directiva, atleta, dirigente, tecniconan etc. A keda palabra cu pa medio juni e federacionnan presente tin e prome draft di e fase analitico cu nan a traha pa nan propio organisacion. COA lo sigui acompana su federacionnan miembro, reconociendo e importancia pa na final di e proceso cada un di nan por traha na un forma planifica y structura. Esun cu lo beneficia di esaki ta e deportista y deporte en general.

gallery1 gallery1 gallery1
gallery1 gallery1 gallery1

Copyright © by Comite Olimpico Arubano. All rights reserved.