b_190_150_16777215_00_images_2014_santiago_apertura_santiago2014_Ceremonia_di_apertura_8.JPGUn bunita experiencia cerca tur cu a desfila durante di e Ceremonia di Apertura di e Weganan Suramericano 2014 na Santiago de Chile. Porcierto un ceremonia colorido cu na final a ser colma cu un ola di vuurwerk. Como representantenan di un isla chikito manera Aruba mei mei di tur e paisnan gigante manera entre otro Brasil, Argentina, Colombia, Venezuela y Chile mes, e sentimento patriotico a reina ora cu nos abanderado Laurence Wilming a drenta e stadion nacional di Chile bou grito y aplauso di e publico presente. Pa cada deportista y delegado di Aruba e momento ey sigur lo keda graba den curazon di cada uno. E ciudad di Santiago de Chile a prepara su mes bon pa ricibi e 14 paisnan participante na e weganan. Ya for di tempran tur e 14 delegacionnan a prepara nan mes pa e desfile, cu nos representantenan di Aruba den e fila number dos, tras di Argentina. E paisnan participante a hasi nan presentacion oficial dilanti di un publico grandisimo y cu hopi entusiasmo. Mas cu claro e gritonan tabata fuertisimo na e entrada di e pais anfitrion, Chile.

 

E ceremonia di apertura a conoce su momentonan protocolario, cu presentacion di e himno Olimpico, hisamento di e banderanan di Comite Olimpico Internacional, a huramenta un atleta y un oficial, tambe por a scucha diferente dignitario hiba palabra, entre otro e presidente di Comite Olimpico Chileno, Neven Ilic, e presidente di e organisacion ODESUR, Carlos Nuzman y finalmente e presidente Peñera di Chile kende na su turno a declara oficialmente e weganan inaugura. E medayista Olimpico di Chile, e ex-tenista Nicolás Massú a percura pa sende e pebetero, e candela Olimpico, cu lo keda briya te na final di e weganan.

 

Manera nos a bisa anteriormente, nos delegacion di Aruba a drenta den e stadion nacional cu padilanti nos abanderado, e hungador di bowling Laurence Wilming. Bisti den un trainingsbroek blou cla y e jacket blou aqua y blanco, simbolo di e color di nos bandera. Un bunita show a ser presenta caminda a mustra e historia di Chile, mientras e anochi a clausura cu un show spectacular di vuurwerk.

Copyright © by Comite Olimpico Arubano. All rights reserved.