Barranquilla2018News

Logro historico pa TEAMARUBA

Diferente medaya pa Aruba na e Weganan Centro Americano y del Caribe

Logro historico pa Team Aruba na e Weganan Centro Americano y del Caribe Barranquilla 2018
Diabierna anochi, e Weganan Centro Americano y del Caribe Barranquilla 2018 a yega su final. Pa Team Aruba completo esaki sin duda ta e weganan cu mas lo keda graba den memoria di hopi. E actuacion di nos atletanan tabata formidabel y esey a trece cune cu e prestacion y logronan tabata uno super grandi pa nos dushi isla. For di e momento cu e landado Mikel Schreuders a logra e prome dos medayanan pa Aruba, e sentimento cu nos por lucha y bataya contra e paisnan grandi a crece serca tur cu a forma parti di e delegacion. Atletanan a cuminsa kere mas ainda den nan propio capacidad y tur pero tur a haci nan maximo esfuerzo pa representa y defende e bon nomber di nan deporte y nan pais. Cada un a demostra cu nos por apesar cu nos ta bini di un isla chikito.

E cantidad di 9 medaya logra pa Team Aruba ta un record nobo pa loke ta e prestacion di nos delegacion den Weganan Centro Americano y del Caribe. Na e Weganan CAC na Veracruz 2014, Aruba a logra conkista 4 medaya en total. Prome cu esey na anja 1993 y 1998, Aruba ta logra 1 medaya mientras na 2002 y 2006 nos no ta logra gana medaya mientras na anja 2010, Aruba ta logra gana 4 medaya.
Awor na Barranquilla 2018, nos atletanan ta logra 2 medayanan di Oro, 1 di Plata y 6 di Brons. Cu e cantidad di 9 medaya conkista pa Team Aruba, nos pais a termina na un di 12 luga den 38 pais participante riba e tabla general di medaya, cual ta un logro grandisimo. Paisnan grandi manera Costa Rica, El Salvador, Honduras, Nicaragua, Haiti y Surinam a keda nos tras. Mirando e resultado na Barranquilla, esaki simplemente ta un refleho y ta bisa hopi di e desaroyo positivo y sigur progreso di nos atletanan, federacionnan, entrenadornan y tur esnan cu directamente of indirectamente ta envolvi den nos deporte.. Esaki no solamente pa esnan cu a gana medaya, pero tambe pa e atletanan cu a keda na di cuater lugar y casi a subi podium manera Philipine van Aanholt di Laser Radial, Feddison Flanders di BMX, e duet synchro di Kyra Hoevertsz y Abigail de Veer, Philip Elhage di Tiro sin lubida varios landadornan cu a yega final A y a termina bon manera Patrick a keda na di 5, Anahi na di 6, Mikel di 7 y 8 y Jordy di 8 lugar. E trabou inmenso aki a lo largo a paga cu un triunfo inolvidabel pa Team Aruba.

Pa Team Aruba por a presta di e forma aki ta hopi hende mester a traha dia y anochi pa realisa tur trabou di preparacion y ehecucion. Un di e personanan aki ta nos Hefe di Mision, Sra. Juelle Thode cu prome, durante y despues di Weganan a y lo sigui traha pa tur cos bay segun buki y finalisa e weganan sin ningun obstaculo pa nos delegacion. Un trabou sigur no facil mirando tur e reunionnan cu mester a atende tur dia, tareanan pa ehecuta, y tur otro tarea importante cu su persona mester a encarga cune cu nunca no ta facil cu e obhetivo principal pa Team Aruba den su totalidad funciona y presta den e forma mas optimal na e weganan. Pabien Juelle pa e magnifico trabou un biaha mas
E caranan di nos atleta y delegadonan na e Ceremonia di Clausura tabata uno di orguyo dificil pa lubida. E sonrisa riba e caranan tabata uno di alegria y mission cumpli. Tur hende a celebra e triunfo pa nos isla. E union entre nos atetanan ta un ehempel den e direccion cu nos tur mester bay traha pa den futuro nos deporte sigui progresa y yega unda nos tur kier mire. A lo largo ta UN ARUBA NOS TA.

E Ceremonia di Clausura tabata bunita cu a duna atencion na e magnifico trabou cu un y tur a haci na Barranquilla, Colombia sin lubida e ciudad di Cali unda e deporte di bowling a tuma lugar. A toca e honor na e atleta Arubano, Kyra Hoevertsz ganadora di tres medaya di Brons na e Weganan CAC 2018 pa ta e abanderado di Aruba na e anochi di clausura. E deporte di Aruba a sa na briya den e 23 edicion di e Weganan Centro Americano y del Caribe celebra na Barranquilla, Colombia. Aki cuater anja e di 24 edicion di e Weganan Centro Americano y del Caribe lo wordo celebra na e ciudad di Panama City, na e pais Panama. Pabien y danki Aruba pa kere den nos representantenan.
Den luna di oktober proximo Team Aruba lo competi na e Weganan Olimpico Hubenil Buenos Aires 2018 celebra na Argentina. Un weganan hubenil cu pa prome biaha lo wordo celebra den e continente Sur America. Team Aruba ta prakticamente cla y nos representantenan te cu awor ta conoci. Nos tin e duonan di beach volleyball femenino y masculino cu a clasifica esta Kayla Arends y Mali Rafini como tambe Raibiently Mercalina y Brian Howell. Tambe lo bay Patrick Sydow den tennis, Giannon Eights den triathlon y Anahi Schreuders den landamento.

Tags

Related Articles

Close