News

Presupuesto 2019 aproba

Federacionnan miembro a aproba e Plan di maneho y Presupuesto 2019

Federacionnan miembro a aproba e Plan di maneho y Presupuesto 2019 di Comite Olimpico Arubano

Dialuna anochi Comite Olimpico Arubano a tene nan di dos Asamblea General di e aña 2018 unda nan miembronan mester a aproba e plan di maneho y presupuesto pa 2019. E asamblea a tuma lugar den e ballroom di Holiday Inn Hotel. Un total di 16 di e 24 federacionnan deportivo miembro di COA a haci acto di presencia na e anochi aki. Cada aña den e lunanan di juni y december, e federacionnan deportivo miembro di Comite Olimpico Arubano ta bini hunto y reuni pa loke ta e Asamblea General di dicho organisacion.

Mester bisa cu dialuna anochi durante di e Asamblea di COA, miembronan presente a mustra nan satisfaccion di e direccion COA ta bin ta hibando e maneho di deporte di nan como miembro. Dos punto cu e resalta na e anochi aki tabata Plan Operacional 2019, acompaña pa su Presupuesto, ambos parti di e Plan Strategico 2017-2020 y e nombracion di e Presidente electo nobo di e Comision di Atleta di COA, Sra. Amanda Maduro cu awor ta haya un puesto den e directiva actual di Comite Olimpico Arubano. Aki Sra. Maduro lo representa e atletanan den COA. Tambe directiva a presenta e Plan di Mercadeo di COA, cu tin como meta pa promove deporte na Aruba y atrae partnernan financiero cu ta desea di yuda e atletanan realisa naan metanan.

E aña 2018 tabata uno super exitoso, e mas exitoso den historia di e existencia di Comite Olimpico Arubano unda Team Aruba a logra no menos cu 12 medaya en total parti den e Weganan Suramericano Cochabamba, Bolivia(3 medaya) y e Weganan Centro Americano y Del Caribe Barranquilla, Colombia(9 medaya). Tambe Aruba pa prome biaha a logra clasifica pa e Weganan Olimpico Hubenil Buenos Aires cu e duonan di beach volleyball femenino y masculino. E anja 2019 tambe lo ta uno hopi ocupa pa COA unda Team Aruba lo participa na tres weganan grandi esakinan Juegos Suramericano de Playa Rosario, Argentina, Juegos Panamericanos Lima, Peru y ANOC World Beach Games San Diego, Merca.

Na final di e reunion e Asamblea a aproba e Plan di Maneho y tambe e Presupuesto pa aña 2019, loke ta pasonan formal importante pa e organisacion.

Related Articles

Back to top button