News

Pabien na tur hende muher

Awe diabierna 8 di maart ta celebra e Dia Internacional di Hende Muher

Un pabien na tur hende muher riba nan dia

Awe diabierna 8 di maart ta celebra e Dia Internacional di Hende Muher. Rond mundo, den diferente organizacion y na tur nivel di sociedad, ta recorda e lucha cu hende muher mester a hiba pa logra un posicion di igualdad cu hende homber. Den e ramo di deporte esaki no tabata un excepcion, aki tambe e hende muher mester a traha duro y demostra cu nan tin e mesun capacidad y derecho cu e ser masculino.

Actualmente por mira cu e hende muher tin un tarea importante y ta ocupa cada biaha mas funcionnan di relevancia. Esaki ta danki na e avanze social di e ser femenino, e hecho cu nan a reconoce e interes di hende muher pa deporte, nan capacidad y talento pa sobresali den cualquier ramo di trabou cu nan escohe. Awendia e hende muher ta participa na un nivel casi igual cu hende homber na deporte como atleta. Tuma por ehempel e weganan di Rio de Janeiro 2016, aki e participacion di e atleta femenino a subi cu 45 porciento, esaki a double e cantidad di participante den 40 anja. Na Rio, un total di 4,700 atleta femenino a competi di e 10,444 atletanan, pues ta casi mesun hopi cu e hende homber. Mas cu claro tin trabounan importante pa hasi ainda ta den e areanan di entrenadonan, oficialnan y muy en particular na nivel di dirigencia den deporte na nivel mundial. Na aña 1996, Comite Olimpico Internacional a aproba un resolucion cu ta obliga tur Comite Olimpico Nacional, pero tambe tur Federacion Internacional, Federacion deportivo nacional y en general tur entidad di deporte, pa inclui den nan organonan di decision un minimo di 20% hende muher y poco poco nos por mira un adelanto un ta cumpliendo cu e exigencianan aki.

Na Aruba, nos por mira cu diferente hende muher den posicionnan clave den varios di nos Federacionnan Deportivo. Den Comite Olimpico Arubano tin pa algun tempo caba, varios hende muher den e directiva ocupando diferente posicion importante. Na banda di esey, Aruba tin un maximo representante den e deporte mundial de persona di Sra. Nicole Hoevertsz, awendia miembro di e “Executive Board di International Olympic Committee” como tambe miembro di e “Executive Board di Pan Am Sports”.

Nos no por keda sin menciona nos atletanan femenino cu pa un decada ta sobresali y saca cara di Aruba den exterior. Nos atletanan femenino ta demostrando un nivel sobresaliente y ta surpasando tur expectativa den e deporte di nos region, continente y mundial. Si nos mira e galardon Premio Excelencia den Deporte unda Aruba ta eligi su mihor atleta di anja, esaki desde su existencia na 2003, un total di 8 biaha a bay pa e atleta di ser femenino, un muestra di e dominio di nos hende muher den deporte na Aruba. Pa djis pa menciona un par nos tin hobennan manera Sarah Quita Offringa cu ta 15 bes campeon mundial den windsurf, Edna Maduro, Thashaina Seraus, Kamilah Dammers di bowling, Philipine van Aanholt di sailing, cu ta medayistanan di Oro den Weganan Centro Americano y del Caribe como tambe Kyra cu a gana varios medaya den Weganan CAC y tambe campeonatonan importante. E anja 2018 tabata uno historico pa algun atleta femenino. E duo di beach volleyball Kayla Arends y Mali Rafini a haci historia door di logra clasifica pa e Weganan Olimpico Hubenil, e prome atletanan hubenil cu e logra esaki pa Aruba. Na banda di esey, e atleta Wendy Kock a landa di Venezuela pa Aruba den e Crossing for Hope mientras Shariska Winterdaal a logra core 500km riba bicicleta rond Aruba. Loke tambe ta resalta ta e envolvimento di nos referee y, coachnan femenino y dirigente na nivel di federacion, cual ta un punto sumamente positivo.

No tin duda cu nos hende muhernan lo sigui presta den deporte, mientras como pais nos lo sigui duna nos maximo apoyo na cada un.

Den nomber di henter nos comunidad nos kier a manda un palabra di pabien na tur hende muher cu ta activo den deporte riba e dia tan special aki, e Dia Internacional di Hende Muher.

Related Articles

Back to top button