Rudy Leysner

Rudy Leysner tabata president di Comite Olimpico Arubano durante e añanan di 1995 y 1996. E otro miembronan di directiva tabata: Rufo de Cuba, secretario; Loyd Leslie, tesorero; Glenda Werleman, segundo tesorero; comisarionan Flavio Faneyte, Len Johnson y Ivan Kelie.

Rudy ta bisa cu bou su presidencia un preparacion debido di nos atletanan a tuma luga na un campo di entrenamento na Cuba cu sosten di diferente patrocinadonan (Aruba Bank, KPMG y Coca Cola) pa por asisti na e Weganan Olimpico na Atlanta, U.S.A. na 1996. Comite Olimpico Arubano tabata tin
e derecho pa manda dos representante pa participa den dos deporte, cu ta atletismo y natacion. Lastimamente cu e Zwembond no a manda nan representante pa participa na e weganan olimpico e temporada ey. Ta solamente un atleta a participa den e deporte di atletismo. Nos a ricibi tambe
dos wild card pa participa den e deporte di hisamento di peso y ciclismo despues di bastante deliberacion cu e federacionnan internacional. Nos fisioterapista a haya cooperacion di un quiropractico Americano cu tur su ekipo pa asina e atletanan haya un miho atencion. Pa prome biaha tur miembro di e delegacion a ricibi un viatico.

Na e weganan olimpico mi a topa prins Willem Alexander kende a acerca mi y a puntra mi con a bay cu e participantenan di Aruba.

Mi mensahe den cuadro di e celebracion di e 64 aña cu atletanan Arubiano ta participa na e weganan olimpico: awe nos por ta orguyoso di mira loke semper nos a boga p’e bira realidad, esta cu e atleta ta na prome luga. Celebracion di 64 aña di participacion di nos atletanan na weganan olimpico ta indica cu ainda nos mester sigui traha tanto riba e mehoracion di nos instructornan como tambe nos atletanan. Awe – na 2016 – nos ta clasifica mas biaha y por mira un aumento den e nivel di nos atletanan, sinembargo mester inverti mas den deporte pa alcansa e nivel den prestacion rekeri.

Close