News

Nicole Hoevertsz contento cu ATA

Tanto Comite Olimpico y Aruba Tourism ta kere den excelencia

Secretaria General di COA, Sra. Nicole Hoevertsz
“Tanto Comite Olimpico y Aruba Tourism ta kere den excelencia, ta kere den promove y hasi mihor di locual nos ta hasi awe”.

Secretario General di Comite Olimpico Arubano y vice presidente di Comite Olimpico Internacional, sra. Nicole Hoevertsz, tambe a dirigi palabra na e ocasion di e firmamento di partnership entre COA y ATA.
Segun sra. Hoevertsz ambos instituto ta para pa promove excelencia. ATA ta hasi esaki den turismo na un forma excelente y unico, unda Aruba rond mundo no mester di introduccion. COA na su turno ta aspira y purba na hasi esaki atrabes di deporte.

“Mi ta bisa concientemente cu COA no ta un organisacion deportivo, nos ta un organisacion cu ta purba na crea un mihor sociedad, mihor sernan humano, atrabez di deporte y esey nos ta logrando cada biaha mihor. Awor cu a formalisa e acuerdo aki, ATA y COA lo sigui traha hunto pa logra hisa e nivel cada biaha mas den deporte.

COA y su atletanan ta representa Aruba hopi bes den exterior. Nos atletanan ta e embahadornan di Aruba den exterior. Nan ta atletanan hoben, positivo y yen di optimismo, cu ta traha duro pa logra bon resultado den deporte. Nan ta representa nos pais tambe riba e plataforma deportivo mas grandi na mundo, esta e Weganan Olimpico. Particularmente e ceremonia inaugural ta wordo presencia y admira pa mas di 3 biyon di hende rond mundo. Pa e motibo aki tambe COA ta dedica asina hopi atencion na e uniform di e Weganan Olimpico. Cada delegacion di Aruba cu ta participa na weganan regional, continental y mundial ta bisti e nomber di Aruba orguyosamente den lomba y riba cada ‘item’ di e uniform. Esaki ta e logo oficial di ATA cu pa basta aña caba COA ta hiba tur caminda den exterior”.

Un otro ehempel di e cooperacion entre ATA y COA ta e logo oficial di COA, cu a wordo diseña pa e agencia creativo di ATA. For di aña 2016 e logo aki ta identifica Comite Olimpico Arubano tur caminda cu nos bai.

E intencion ta pa e proximo añanan COA sigui inverti den e recursonan mas importante di nos pais, esta e recursonan humano. COA ta kere hopi den esaki, caminda ta dunando hopi atencion na e atletanan, entrenadornan, dirigentenan y organisacionnan deportivo. Asina aki COA ta kere cu ta creando un mihor Aruba.

Segun Nicole mes a bisa; “Mi ta kere cu cada Arubiano riba e isla aki lo ta contento cu esaki, esta cu a trabes di deporte ta crea mihor ciudadanonan y un mihor pais. COA ta sumamente feliz cu e partnership aki, cu lo ta beneficioso pa ATA y sigur tambe pa COA y nos miembronan”.

Related Articles

Check Also
Close
Back to top button