News

Talent Identification Program

COA y AAA a sera un acuerdo riba e proyecto

Comite Olimpico Arubano y Aruba Airport Authority N.V.(AAA) a sera un acuerdo riba e proyecto Talent Identification Program.

Diahuebs atardi tabata un dia historico pa Aruba su deporte, mirando cu Comite Olimpico Arubano a sera un acuerdo cu AAA unda e ultimo lo yuda financia un proyecto valioso cu pronto lo inicia. E proyecto titula “Talent Identification Program” ta ensera cu COA pa medio di su partnernan lo cuminsa traha riba e identificacion di nos atletanan hoben cu dentro di algun aña lo mester bira cara di nos dushi isla den exterior. E identificacion di nos atletanan hoben lo start na nos scolnan basico bou guia di nos maestronan cu a finalisa e estudio Movecion y Salud na IPA.

Presente na e acto di firmamento tabata e CEO di AAA, Sr. Joost Meijs, CFO di AAA Sra. Aisha Anthony y CCO di AAA Sra. Barbara Brown. Pa COA Tabata presente, presidente y vice–presidente, Sr. Roy Mezas y Sra. Wanda Broeksema.

Prome cu a firma e convenio, Sr. Mezas y Sra. Broeksema a duna e board di Triple AAA un amplio splicacion pa loke ta e trabou cu COA ta eherce den nos comunidad deportivo. Tambe a elabora riba e prestacion di nos atletanan elite na nivel regional, continental y mundial. AAA a haci varios pregunta y tabata masha contento cu e forma con COA y su partnernan ta trahando na bienestar di nan atletanan y e federacionnan miembro.

Na final ambos partido a firma e convenio y tabata masha contento cu e cooperacion di por traha hunto na un proyecto cu ta na fabor di nos hubentud local.

 

Tags

Related Articles

Close