Buenos Aires 2018News

Team Aruba ta bek

Despues di un bon actuacion delegacion di Aruba ta bek

Team Aruba a yega bek despues di un bon actuacion den e Weganan Olimpico Buenos Aires 2018

Diasabra merdia riba vuelo di Copa Airlines, e delegacion participando na e Weganan Olimpico Hubenil Buenos Aires 2018 a regresa Aruba despues di a permanence casi tres siman na e capital Argentino. Den e VIP room di Aruba Airport Authority e famia di e atletanan a ricibi nan cu hopi aplauso. Presente tambe na e ocasion aki Presidente di COA, Sr. Roy Mezas, e miembronan di Parlamento di Aruba, Sr. Meneer Edgard Vrolijk y Sr. Rocco Tjon y Prensa.

Palabranan di elogio so tabata tin pa nos atletanan Olimpico Hubenil di tur persona cu a hiba palabra e atardi aki. Nos muchanan a demostra e corahe na tur momento y a lucha pa logra un bon resultado pa nan mes, nan deporte cu nan ta representa y mas cu claro pa Aruba. Nan a comporta nan mes como berdadero embahadornan di nos isla. Esaki tabata djis e comienso, e miho di nos atletanan hubenil tin cu bini ainda.

Na final cada un atleta a haya un bunita regalo como recuerdo, obsekio ofreci door di e PR-Team di COA, Noel Sandi Werleman y Seever Krozendijk

Un pabien na atletanan y nan coachnan pa e tremendo prestacion desplega na e Weganan Olimpico Hubenil Buenos Aires 2018

Tags

Related Articles

Close