News

Weganan Olimpico di Tokyo 2020 lo sigi

E “Corona virus” no lo stroba e continuidad di e Weganan Olimpico

Relaciona cu Corona virus: Weganan Olimpico di TOKYO 2020 lo sigui

Den un reunion di Comite Ehecutivo di Comite Olimpico Internacional cu a tuma lugar awe diamars na e cede principal na Lausanne, Suisa, IOC a yega na e conclusion cu e Covid-19 virus, conoci mundialmente como e “Corona virus” no lo stroba e continuidad di e Weganan Olimpico cu dentro di algun luna lo tuma lugar na e ciudad di Tokyo, Japon.

Covid-19
Manera ya conoci e Covid-19 virus ta un forma nobo (version nr 7) di e virus cu ta causa griep tambe. E ta un version nobo di e virus cu ta plama lihe y ta hopi contagioso. Si bo wordo contagia, bo por bira malo y ta haya un griep pisa. Den solamente 5% di e casonan e simptomanan ta serio. Esey ta mas tanto den caso di personanan di edad avansa, of cu ta debil, cu ta malo of cu tin resistencia hopi abou. Eseynan mas tanto ta esnan cu ta core riesgo di por fayece debi na e virus aki. E otro personanan ta recupera despues di mas o menos dos siman.

World Health Organization ta califica
Mester bisa cu IOC ta den contacto continuo cu expertonan di e World Health Organization, cu ta cualifica e Covid-19 como un “local epidemic” y NO un “pandemic”. Ta bon pa tene cuenta cu cada aña ta fayece mas o menos 500.000 persona di e griep normal, esta e “seasonal flu”. Sen caso di e Corona virus e cantidadnan ta mucho mas abou. E expectativa ta cu e griep nobo aki lo desaparece, of cu e lo bira menos serio. Claro cu pa awor e ta dificil pa pronostica cu seguridad.
WHO ta e instancia mundial cu ta monitorea malesanan y ta duna conseho tocante pasonan pa tuma. WHO no a conseha pa impone restriccion di biahe. Otro organizacionnan ta varia den nan recomendacionnan. No tin unanimidad den e recomendacionnan y nan ta cambia regularmente.

Task Force
Mirando e problematica, IOC tin un task force interno cu ta studia e situacion. Comite Organizador di Tokyo 2020 tambe tin Task Force interno. Entre e diferente organisacionnan (incl. WHO) a crea un All Partners Task Force, cu ta consulta y mantene coordinacion di e pasonan pa tuma. Nan ta reuni semanalmente y ta sigui henter e desaroyo rond di e corona virus. Den seno di IOC mes, e Directornan General ta reuni 3x pa siman y ta monitoria henter e proceso di cerca.

Corona Virus y su efecto riba e eventonan clasificatorio
E noticia rond di e Covid-19 a trece un situacion dificil cune pa loke ta e eventonan clasificatorio pa e Weganan Olimpico di Tokyo 2020. No obstante esaki, mayoria di e eventonan ta sigui segun plan. Te cu awor di e mas o menos 500 evento clasificatorio: 10 evento a wordo cancela, 15 evento a wordo posponi, 8 evento a wordo re-aloca. E otronan a sigui segun plan. Ta posibel si cu e otro eventonan por a confronta impacto pa loke ta e participantenan. Pesey mes ta studiando awor si ta necesario pa tuma medida pa hasi algun cambio den e sistema di clasificacion. Por ta cu e evento clasificatorio a wordo cancela, awor ta bai wak con pa atende cu esey.
Den caso di “test events” na Tokyo, a modifica e formato, manera por ehempel hasi e evento pero sin publico. Asina mes e test events ta sigui, sin plan pa cancela of pospone esakinan.

Tur cos ta sigui normal
Notable ta cu e ceremonia di e cendemento di e candela Olimpico na Grecia riba dia 12 di maart ta sigui normal segun schedule. Solamente a simplifica e programa, cancelando e aspectonan no-escencial den e programa.
Pa loke ta comunicacion cu e atletanan, esaki ta tuma lugar na diferente manera. Lo manda comunicacion general y tambe personalmente, motivando e atletanan pa sigui cu nan preparacion pa e clasificacion y participacion na e Weganan di Tokyo. IOC ta coordina y comunica tambe frecuentemente cu e NOCs mas afecta. Na China mes ta kere cu e virus a yega su “peak” y awor ta birando menos. Awor aki tin mas caso pafor di China. Ningun atleta di China ta afecta y nan ta entrenando mas tanto pafo di China.

Claridad
Resumiendo e reunion di Comite Ehecutivo di IOC riba e problematica di e Covid-19 por bisa cu riesgo den caso di Corona virus ta minimo. Mester enfoca riba higiena, manera recomenda pa WHO: laba man! Ora cu un persona ta cuminsa mustra simptoma di ta malo (tosamento, dolor di garganta, keintura), isola e persona y lag’ue keda asina te ora cu e recupera, loke ta dura mas o menos dos siman. Ta importante pa tuma medida pero proporcional. Tene cabes frieuw, no drenta den panico. WHO te ainda no a wak ningun motibo pa declara un restriccion general di biahe. WHO ta considera e Weganan Olimpico como un safe event. Ta importante pa keda duna informacion CORECTO y completo tocante e virus y su efecto pa e Weganan Olimpico di Tokyo.

Tags

Related Articles

Close