Aruba no ta logra vence Indonesia

Duo di beach volleyball masculino di Aruba, Brian Howell y Raibiently Mercalina no a logra vence Indonesia den un tremendo Partido na Buenos Aires.

Despues di a cay venci contra di Venezuela den nan prome wega cu e score di 2 – 0, e duo di Beach Volleyball di Aruba mester a enfrenta kizas e contrincante mas fuerte den e poule aki cu ta Indonesia kende a derota USA 2 – 0 den nan prome wega hunga.

Apoya pa e delegacion di Aruba riba cancha 1, Brian y Raibiently a inicia bon na e prome set. Dado momento nos tabata hasta aruba cu 3 punto pero cada bez e duo di Indonesia tabata bini bek den e wega. Mester bisa cu e prome set a bay cabez cabez te na e score di 16 – 16, aki nos muchanan a perde e concentracion y ta laga e prome set bay unda Indonesia ta gana 21 – 17. Den e di dos set nos por a wak e mesun patronchi di wega cu e prome set. Aruba a mustra casi pareu cu Indonesia y aki tambe nos a yega te na 13 – 13, error nan costoso y innesecario manera perde nos surf asina cu nos a gane, a costa e duo di Aruba puntonan crucial. Aki Aruba ta perde cu e score di 21 -16 y asina tambe e set 2 – 0. Den weganan asina mester keda doscien porciento cu e concetracion riba e wega. Notable ta cu e hungadornan di Indonesia tabata hopi halto di estatura compara cu Aruba cual sigur a hunga un rol ora di smash bala.

Aruba sin duda e demostra un super bon wega aki cu por a bay ambos banda. Raibiently y Brian sigur tin un bon futuro den beach volleyball. E hecho cu nan tin apenas mei anja hunto ta bisa tur cos di e nivel di ambos den un elenco mundial aki den e Weganan Olimpico Hubenil na Argentina. Hunto nan lo por logra cosnan grandi pa Aruba den futuro sercano.

Nos hobennan lo hunga diahuebs 11 di oktober nan ultimo partido contra di USA den un wega super crucial pa ambos ekipo.

Exito na Brian y Raibiently como tambe na coach Elmerlindo.