Aruba presente na Cochabamba

Diahuebs merdia, e delegacion Arubano participando na e Weganan Suramericano Cochabamba 2018 a keda oficialmente yama bon bini na e ciudad di Cochabamba, Bolivia.

Den e Villa Sur Americano a tene e tradicional ceremonia di bandera unda e prome paisnan participante na e “ XI Juegos Suramericanos Cochabamba 2018 a hasi acto di presencia. Na e weganan aki e 14 paisnan di e continente Sur America lo bataya den e 35 deportenan unda mas cu 5000 atleta y oficial lo ta formando parti di e magno evento aki. E ciudad anfitrion Cochabamba y su hendenan a yama bon bini na henter nos delegacion di atleta, coach y dirigentenan. Mester bisa cu pa Aruba, e atletanan Shanayah Howell y Joel Kuiperi y nan coachnan Estaba y Gallego hunto cu e hefe di mision, e staf tecnico a presenta na e ceremonia di bandera mirando cu e atletanan di bowling ta hospeda na e ciudad di La Paz caminda e weganan di bowling lo tuma lugar.

Hefe di Mision, Sra. Juelle Thode a intercambia regalo cu un representante di e Ministerio di Deporte di Bolivia. Den e fin di siman benidero e Weganan Suramericano Cochabamba 2018 lo inicia oficialmente unda lo tin e Ceremonia di Apertura.