Ayera a tuma lugar e Asamblea General di Comite Olimpico Arubano
Diamars anochi den ballroom di Holiday Inn, 15 Federacion afilia na Comite Olimpico Arubano a presenta na e ultimo Asamblea General di 2021. Presidente di COA, Wanda Broeksema a inicia e anochi yamando tur esnan presente bon bini y duna inicio na e Asamblea.
Un di e punto nan di agenda tabata e cambio di dia di Asamblea, pa cambia esaki di un evento den siman y pasa pa uno riba un diasabra mainta pa proximo Asamblea cu lo mester tuma lugar den luna di juni. Esaki a ser aproba pa e miembro nan presente.2do Secretaria General, Zulema Dabian-Erasmus a hiba palabra tambe durante e anochi y a presenta e Plan Operacional 2021. Un plan cu ta regarda varios punto di interes pa COA su maneho y tambe locual kier logra den 2022 conhuntamente cu nos atletanan y federacion nan.
Tesorero di COA, Giovanni Bermudez a presenta e Budget 2022 y den esaki tur miembro presente por a mira e diferencia di 2021 y locual ta spera den 2022.
Secretaria General, Nicole Hoevertsz tambe a hiba palabra durante e anochi aki y a trece varios punto di preocupacion entre otro dos deporte olimpico cu tin e chens di keda sin participa na Weganan Olimpico debi na maneho irregular.
Presidente di COA, Wanda Broeksema a sera e anochi cu un mensahe pa tur esnan presente y na mes momento algun federacion a trece algun sugerencia dilanti cu directiva di COA lo pone atencion na nan.
COA kier a gradici tur e Federacion nan presente y tambe kier a desea nan como tambe e pueblo di Aruba un feliz dianan di fiesta den compania di nan famia y pa aña 2022 ta uno cu mas logro deportivo pa Aruba.
