NewsSan Salvador 2023

Ceremonia despedida

Delegacion di Aruba ta cla pa sali pa San Salvador

Ceremonia di Despedida pa e delegacion di Aruba cu lo sali pa e Weganan Centro Americano y del Caribe di San Salvador, El Salvador
Diahuebs anochi den e sala di reunion di SSA, Comite Olimpico Arubano (COA) a tene un anochi di informacion y alabes a celebra e ceremonia di despedida di e delegacion di Aruba cu otro siman lo sali pa e Weganan Centro Americano y del Caribe El Salvador 2023.
Na e ocasion aki tabata presente, varios di e 28 atletanan y nan coachnan, miembronan di directiva di COA, e diferente comisionnan di COA, mayornan, federacionnan y invitadonan special.
Hefe di Mision, Kenneth Vrolijk y Secretaria General di COA, Sra. Nicole Hoevertsz a dirigi e reunion unda a splica riba e importancia cu e weganan lo ta pa e delegacion ya cu e Weganan CAC ta nos “Weganan Olimpico”. Como hefe di mision, Kenneth Vrolijk a duna un amplio splicacion riba e parti logistica y organisatorio di e weganan na El Salvador. Tambe a duna informacion general di e biahe di e delegacion y e reglanan cu mester tene cuenta cune na El Salvador durante di e casi tres siman na e ciudad di San Salvador y Punta Cana(Republica Dominicana) cual ta sub sede di e weganan unda e deporte di Taekwondo lo tuma lugar.
E 28 atletanan, di cual 23 9 hende muher y 5 hende homber representando 10 deporte cu lo bataya contra e mihor atletanan di e region Centro America y Caribe.
Por ultimo, e atletanan di landamento, Elisabeth Timmer(femenino) y Patrick Groters(masculino) a wordo nombra como e abanderadonan, ambos lo bira e personanan cu lo carga e bandera di nos pais durante e ceremonia di apertura di e Weganan Centro Americano y del Caribe na San Salvador, El Salvador.
Secretaria General di COA, sra. Nicole Hoevertsz a pasa e bandera di Aruba na hefe di mision, Kenneth Vrolijk cu por ultimo a pasa esaki na abanderado femenino Elisabeth Timmer.
COA ta desea cada un di e integrantenan di e delegacion pa e Centro Americano y del Caribe tur clase di exito y lo sigui nan pasonan di cerca, manteniendo pueblo di Aruba na haltura na tur momento.

Related Articles

Back to top button