Britta a realisa su prome entrenamento

Dentro di algun dia e lo haci su debut pa Aruba den un Wega Panamericano. Y sin duda nos landado di mar bierta(openwater swimming) Britta Schwengle ta hopi entusiasma pa logra un bon papel den e competencia Panamericano Santiago 2023 cu lo tin un recorido di 10km. Bou guia di coach Tyrine de Kort, Britta ya caba a entrena algun biaha den e Centro Acuatico como tambe na e Laguna Los Morros, San Bernardo. Mas cu claro e awa ta uno frieu debi na e temperatura abou na Santiago, Chile.

Den un combersacion sosteni cu Britta e la conta nos cu e awa den e lagoen ta hopi frieu, pero ainda no ta dicidi si e lo landa cu su wetsuit. Tambe e lagoen ta awa dushi pues ta algo nobo. Mester bisa cu aki, Britta a entrena den piscina prome y despues e lagoen y e mester acopla. No obstante di tur cos, Britta ta confia cu e lo haci un bon papel den e Weganan Panamericano Santiago 2023. Britta lo competi diadomingo awor pa 9or di mainta aki na Santiago, Chile.

Hopi exito Britta.