Britta Schwengle ta mira atras bek na un tremendo prestacion

Britta Schwengle ta mira atras bek na un tremendo prestacion den Weganan Suramericano Asuncion 2022

E atleta di Open Water, Britta Schwengle a representa Aruba awe den e Weganan Suramericano Asuncion 2022 aki na Encarnacion den e Parana River. Apesar cu e competencia a wordo suspendi na dos ocasion pa motibo di awacero, e atleta tabata sinti su mes cla pa e reto.

Encarnacion tabatin un temperatura di 13 grado celcius y cu awacero compaña cu biento esaki tabata sinti un poco mas frieuw. Na momento cu e oficialnan a hasi test di e awa su temperatura esaki a resulta na 19 grado celcius cu ta hasi e uzo di ‘Body Suit’ uno opcional. N’e momento aki Britta a dicidi uza su ‘Tech Suit’ pa motibo cu no a custuma na e ‘Body Suit’.

Pa 12’or exacto, atleta nan masculino a drenta e awa y 5 minuut despues a yama esnan femenino. Despues di un ora den awa e tempo a bolbe sera y den e ocasion aki a yob’e bastante, cu consecuencia cu visibilidad a bay por completo y hasi’e uno mas dificil pa e atleta. Apesar di esaki, Britta a sa di mantene su posicion y den e ultimo buelta ta logra posiciona su mes na di 11 lugar.

Britta ta sinti satisfecho cu su participacion aki na Paraguay y ta cla pa su siguiente competencia cla pa representa Aruba unbes mas.