News

Asamblea General 2019

Federacion miembro a aproba Plan di maneho y presupuesto 2020 di Comite Olimpico Arubano

Durante Asamblea General
Federacion miembro a aproba Plan di maneho y presupuesto 2020 di Comite Olimpico Arubano

Recientemente Comite Olimpico Arubano a tene nan di dos Asamblea General di e aña aki den e ballroom di Holiday Inn Hotel. Mester bisa cu e atendencia tabata uno grandi unda 21 di e 24 federacionnan deportivo a haci acto di presencia na e anochi aki. Cada aña den e lunanan di juni y december, e federacionnan deportivo miembro di Comite Olimpico Arubano ta bini hunto y reuni pa loke ta e Asamblea General di dicho organisacion.

Na e Asamblea aki un bes mas esnan presente a mustra nan satisfaccion di e direccion cu COA ta bin ta hibando e maneho di deporte di nan como miembro. Despues di varios pregunta, sugerencia y votacion di e miembronan presente den e sala, a aproba e presupuesto 2020 y e plan di e maneho cu Comite Olimpico Arubano lo bai hiba durante aña deportivo 2020, unda lo inicia cu e ciclo nobo pa e proximo cuatro añanan cu ta bini. E 21 federacionnan presente a ricibi a plan di maneho 2020 cu hopi positivismo mirando cu den e 6 lunanan desde juni, nan ta haya cada bez un update di e forma con COA a traha segun e plan stategico presenta. Esaki ta conta tambe pa e presupuesto mara na e maneho. E cede nobo Comite Olimpico Arubano lo bira un realidad ya cu esaki a wordo unanimanente aproba pa e federacionnan miembro. Aki un soño di añanan lo wordo cumpli. Tambe varios otro plan a wordo realisa den 2019 manera e plan di Recurso Humano, plan di Mercadeo unda a haya algun partnernan nobo.

Pa loke ta e parti deportivo a elabora riba e exito di e Weganan Panamericano di LIMA, Peru unda cu nos atletanan sin duda a logra obtene un bon resultado, uno satisfacorio cu a termina cu e conkista di Aruba su prome medaya Panamericano obteni pa e atleta di RS-X, Mack van den Eerenbeemt. Na vispera di e Weganan Olimpico di Tokyo 2020 dentro di 7 luna, mester bisa cu den comparacion cu Rio 2016 esaki ta un tiki menos ya cu e temporada di Rio a clasifica cu 7 atleta mientras cu pa Tokyo no a clasifica ningun atleta ainda pero si cu varios potencial cu lo por yega na nan posibel clasificacion, algo no facil. Pa e motibo aki tambe COA inicia algun siman atras cu e proyecto Talent Identification Program unda lo traha riba un desaroyo riba termino mas largo di nos talentonan cu lo por aspira pa yega na e Weganan Olimpico di 2024 y 2028.

Ta bon pa bisa aserca cu tur presente a observa un minuut di silencio, na momento cu e noticia a drenta cu e dirigente deportivo, den pasado dirigente di Comite Olimpico Arubano, Sr. Francisco “Chipen” Chirino awe den felis memoria a fayece. Tambe e federacion di futbol, Arubaanse Voetbal Bond – AVB a haci entrega di nan plan strategico y Grow Football na Comite Olimpico Arubano.

COA hunto cu su direccion di Deporte y Departamento Medico y di Ciencia di Deporte den bon cooperacion cu nan 25 federacionnan miembro lo sigui traha duro y cu dedicacion, pa asina nos deporte dal un stap mas den e miho direccion desea.

Related Articles

Back to top button