NewsTokyo2020

Ceremonia Despedidad

Aruba ta cla pa sali pa e weganan di Tokyo

Ceremonia di Despedida pa e delegacion di Aruba cu lo sali pa e Weganan Olimpico di Tokyo, Japon.

Dialuna anochi durante un ceremonia chikito na e oficina di Sportsubsidie Aruba (SSA) a celebra e ceremonia di despedida di e delegacion di Aruba otro siman lo sali pa e Weganan Olimpico Tokyo Japon 2020. Na e ocasion aki presente, e 3 atletanan Olimpico di cual dos presente esta Allyson Ponson y Mikel Schreuders y 1 virtual for di Corsow cu ta Philip Elhage. Tambe e coach di landamento, miembronan di e directiva di COA, e comision tecnico di COA, invitadonan special y e delegado di prensa.

Presidente di COA, Sr. Roy Mezas y Secretaria General di COA, Sra. Nicole Hoevertsz a dirigi algun palabra na esnan presente unda a splica riba e importancia cu e weganan lo ta pa e delegacion sigur despues di a pasa den un aña hopi dificil pa e deporte mundial debi na e pandemia di COVID_19. E weganan no lo bay ta mescos tur e otronan, e biaha aki sin e publico di exterior, sin e ambiente unico na e complehonan. E weganan di Tokyo 2020 lo ta unico, uno special y lo sirbi como un simbolo di speransa, un muestra cu humanidad a sa di surpasa e pandemia, y bini hunto pa celebra e evento deportivo mas importante, cu ta alavez e evento pacifico mas grandi na mundo. E Weganan lo bira e “luz na final di e tunnel”, cu a duna hende speransa.

Hefe di Mision pa Tokyo 2020, Kenneth Vrolijk a duna informacion general di e biahe di e delegacion y e reglanan stricto pa seguridad propio cu mester tene cuenta cune na Japon durante di e simannan na Tokyo.
Por ultimo, mirando cu e aña aki a papia hopi y promove e tema igualdad, IOC a tuma e desicion pa cada comite nacional nombra dos abanderado, un hende muher y un hende homber. Den e caso di nos delegacion di Aruba e atletanan di landamento, Allyson Ponson y Mikel Schreuders lo ta e abanderadonan di nos pais durante e ceremonia di apertura di e Weganan Olimpico 2020 na Tokyo, Japon.

COA ta desea cada un di e integrantenan di e delegacion pa e Weganan Olimpico Tokyo 2020 tur clase di exito y lo sigui nan pasonan di cerca, manteniendo pueblo di Aruba na haltura na tur momento.

Tags

Related Articles

Check Also

Close
Close