Ceremonia di despedida di e delegacion cu lo sali pa e Weganan Sur Americano Cochabamba 2018.
Diamars anochi den e Frank Conway room di Casa Del Mar, Comite Olimpico Arubano a tuma despedida di e delegacion Arubano cu lo representa nos dushi isla den e Weganan Odesur 2018 na Bolivia. E anochi a habri unda a tene un minut di silencio na honor di Sr. Austin Thomas awe den felis memoria cu na bida tabata presidente di e federacion di esgrima.
Secretaria General di COA, Sra. Nicole Hoevertsz a splica enbreve e structura di e organisacion ODESUR.
Hefe di Mision, Sra. Juelle Thode a duna informacion riba diferente tema relaciona cu e weganan cual ta hopi importante pa tanto e atletanan y e delegadonan presente. A elabora riba e comportamento y responsabilidad di e delegacion, e parkenan deportivo, e parti praktico, e Villa Odesur y e alimentacion.
Por ultimo a presenta e delegacion Arubano cu lo representa nos dushi isla na Cochabamba, Bolivia. E 10 atleta y coachnan nan ta Monica Pimentel y Teo Rodriguez -Taekwondo, Kamilah Dammers-Naddall, Thashaina Seraus, Elias Halabi, Yannick Roos y coach Chris Dammers-Bowling, Philip El Hage y coach Harold Heyliger-Tiro, Quincy Breel y coach Anthony Salas -Atletismo, Shanayah Howell y Feddison Flanders y coach Pedro Estaba-BMX y Joel Kuiperi y coach Patrick Vrolijk-Pesas. Tambe lo biaha Alberto Thiel, Direccion Tecnico y Steven Helmeyer, Direccion Medico cu lo forma parti di e delegacion.
Mester bisa cu e atleta femenino di BMX, Shanayah Howell a wordo escohi pa ta e abanderado na e Weganan Cochabamba 2018. Manera Shanayah mes a bisa; “Cu tur honor y orguyo mi lo carga e bandera di Aruba durante di e Ceremonia inaugural di e Weganan di Cochabamba”.
