Ceremonia di Despedida pa Delegacion di Aruba pa e Weganan Olimpico Paris 2024
Diaranson anochi dilanti e oficina di Comite Olimpico Arubano (COA), a celebra e ceremonia di despedida di e delegacion di Aruba cu lo biaha pa e Weganan Olimpico Paris, Francia. Durante e ocasion, dos di e seis atletanan cu lo biaha pa Paris tabata presente, mientras cu miembronan di e directiva di COA, coachnan, mayornan, e federacionnan deportivo, invitadonan special y prensa tambe tabata presente.
MC di e evento, Jonathan Wever, a yama un caluroso bon bini na tur asistente. Presidente di COA, sra. Wanda Broeksema, a expresa su orgullo ya cu e aña aki Aruba lo ta representa na Paris cu 6 atleta. Tambe a duna un gradicimento especial na partnernan di COA y Gobierno di Aruba pa e sosten constanti.
Kamilah Dammers, hefe di mision pa e weganan, a splica e parti logistica y organisatorio di e evento y tambe a desvela e pin oficial di Paris 2024, e uniform pa e proximo ciclo Olimpico, y e trahe pa Ceremonia di Apertura, modela pa nos atletanan Chloe Farro y Philip Elhage.
Discursonan Inspirante y Abanderadonan
Diferente partnerman di COA, como Aruba Tourism Authority y Royal Aruba Aloe, tambe a dirigi nan palabra, resaltando e patriotismo y orgullo di representa Aruba riba e plataforma mundial. Cada discurso a enfatisá e sacrificio y esfuerzo cu a yega pa e puntonan aki, enfatizando disfruta di cada momento inolvidabel.
Finalmente, Mikel Schreuders y Chloe Farro a wordo nombra como abanderadonan pa e Ceremonia di Apertura di e Weganan Olimpico Paris 2024. Un Billboard nobo cu tur nos atleta tambe a wordo desvela.
Conoce nos Atletanan:
- Chloë Farro y Mikel Schreuders – Landamento
- Ethan Westera y Just van Aanholt – Vela
- Shanayah Howell – Ciclismo/BMX
- Philip Elhage – Tiro
E ceremonia a conclui cu un momento emotivo, un recorido di nos ex-atletanan Olimpico, mientras Chloe Farro y ex-atleta Allyson Ponson a ‘touch’ e dos antorchanan hunto pa oficialmente duna inicio na e caminda pa e Weganan Olimpico Paris 2024.
COA ta desea cada un di e delegacion exito y ta sigui nan pasonan manteniendo nos pueblo informá na tur momento.
