Forma Parti di un Experiencia Unico como “Chef de Mission”

Manera ta conoci, Comite Olimpico Arubano (COA) ta participa den weganan di e ciclo Olimpico, cu den Aruba su caso ta nifica participacion den weganan den e region Panamericano y Sudamericano. Pa e participacion aki, claramente tin atletanan ta prepara hopi duro pa por competi na e nivel mas halto, ademas di tin nan entrenadornan cu ta percura pa un bon nivel di entrenamento y guia.

Banda di e grupo di atleta y entrenador, bo tin e ekipo tecnico di COA cu tambe ta forma parti di e grupo aki, dunando guia general y observando e proceso pa asina yuda pa tin e nivel mas halto posibel. Igual di importante cu tur e aspectonan tecnico menciona, tin cu hasi hopi trabou di preparacion den cuadro di logistica y administracion, pues registra na e weganan, cumpli cu tur e procesonan ademas di tin un comunicacion estrecho cu e comision di organisacion di e weganan, pa asina regla tur cos pa e delegacion di Aruba por participa exitosamente.

Den e rol clave aki, tur delegacion tin nan “CHEF DE MISSION”, cu ta fungi como e lider y vocero di e grupo den e weganan.

Nos ta buscando individuonan interesa den forma parti di e experiencia unico aki! Si bo ta interesa, manda bo CV via email info@olympicaruba.com. Si ta desea mas informacion, tira un bista riba e flyer, unda tur detaye ta poni, incluyendo un number unda por busca mas informacion. Corda cu e deadline ta dialuna awor, y despues di esey lo sigi cu e proceso di seleccion.