1. Historia di e desaroyo olimpico Arubano

Na aña 1952 shete futbolista Arubano a wordo selecta pa forma parti di e seleccion Antiano pa bay e Weganan Olimpico na Helsinki, aya na Finlandia. Despues di e olimpiada aki a dura te cu e Olimpiada di 1976 na Montreal na Canada unda cu un atleta Arubano, esta Willem ‘Tico’ Maduro, a ser selecciona den ramo di judo, pa participa na e weganan olimpico. E siguiente biaha despues di 1976, cu a selecciona atleta pa participa na un wega olimpico tabata na aña 1984. Aki a selecciona 3 atleta, esta Esther Croes y Nicole Hoevertsz den ramo di landamento sincronisa y Evelyn Farrell, coredo den ramo di coremento duro riba 100 y 200 meter. Cu nan tambe a cera e era den cual e atletanan Arubano ta forma parti di e delegacion di Nederlands Antilliaans Olympisch Comité (NAOC). Despues di 1984 varios atleta Arubano a keda selecciona pa participa na weganan olimpico. Awo e atletanan aki a cay bou di auspicio di Comite Olimpico Arubano. E cantidad di deporte, disciplina y evento, na cual e atletanan Arubano a participa tabata varia di un wega olimpico pa un otro.

Pues ta for di 1952 caba cu e atletanan Arubano a participa na weganan olimpico. Na 1952e bandera cu Ergilio Hato a carga na e ceremonia di apertura tabata e tricolor Hulandes. Remarcabel ta cu ya for di 1950 Nederlands Antilliaans Olympisch Comité tabata miembro oficial di e Comite Olimpico Internacional y a keda miembro di e movemento olimpico te cu juli 2011. Consecuentemente e delegacion Antiano a bay e weganan olimpico na 1952 bou auspicio di Nederlands Antilliaans Olympisch Comité. Prome cu introduccion di e status aparte, entrante 1 januari 1986, Aruba tabata forma parti di Antias Hulandes y como tal a participa na e Weganan Olimpico na Montreal na Canada na 1976 y na Los Angeles na U.S.A. na 1984 como miembro di e delegacion Antiano y a cay bou auspicio di Nederlands Antilliaans Olympisch Comité.

Historia y desaroyo estatal di Antias di cinco
Pa loke ta toca e historia estatal di Antias di cinco e situacion a cambia riba
10 di october di 2010. Antias di cinco a stop di existi como pais autonomo den
Reino Hulandes. Corsou y Sint Maarten a bira paisnan autonomo den Reino
Hulandes. Bonaire, Sint Eustasius y Saba a bira bijzondere gemeenten di
Hulanda, e asina yama ‘openbare lichamen’. E desaroyo estatal despues di e
fecha akiriba menciona tabata tin consecuencia p’e miembresia di Nederlands
Antilliaans Olympisch Comité den e movemento olimpico. E decision pa anula
e miembresia di Nederlands Antilliaans Olympisch Comité a wordo tuma pa
e directiva ehecutivo di Comite Olympico Internacional y na juli 2011 den un
sesion di Comite Olimpico Internacional na Durban na Sur Africa e decision
aki a keda ratifica. E atletanan di Corsou y di Sint Maarten cu kier participa
na e weganan olimpico por haci esaki via Comite Olimpico Arubano of
via Nederlands Olympisch Comité, pues sea atleta cu ta representa
Aruba of Hulanda.

Historia y desaroyo estatal di Aruba den Reinado Hulandes
Prome cu 15 december 1954 Aruba tabata parti di e colonia Hulandes Curaçao
en onderhorige eilanden. Entre 1951 te cu introduccion di Statuut entrante 15 di
december 1954, e parti aki di reino tabata conoce un Interim-Regeling, cu tabata
e fase transitorio bayendo pa e Statuut. Cu e introduccion di Statuut Aruba a
bira parti di e pais di Antias Hulandes (Antias di seis). Antias Hulandes a bira un
pais autonomo den reino Hulandes. Aruba a sali for di Antias Hulandes entrante
introduccion di e status aparte pa Aruba riba 1 januari 1986. Aruba a bira un
pais autonomo den reino Hulandes. Antias di seis a bira Antias di cinco.

2. Fundacion y reconocimento di Comite Olimpico Arubano

Aruba tin su propio Comite Olimpico Nacional cu yama Comite Olimpico Arubano, cu a wordo funda na 1985. E fundadonan ta 14 Federacionnan Nacional di Deporte Arubano. Na 1986 Comite Olimpico Arubano a haya reconocimento oficial di su madre organisacion Comite Olimpico Internacional. Como tal e ta forma parti di e movemento olimpico. Su mision, manera e ta pa cada comite olimpico nacional, ta pa desaroya y proteha e movemento olimpico den su pais y ta haci esaki di acuerdo cu e Carta Olimpico. Segun stipula pa e Charter, Comite Olimpico Arubano ta autorisa pa manda atletanan weganan olimpico.

Pues, e miembresia oficial di Comite Olimpico Arubano ta encera entre otro cu participacion di atletanan Arubano na e weganan olimpico cu for di e tempo ey ta cay bou di Comite Olimpico Arubano. Tabata un momento importante den e historia deportivo y olimpico Arubano ora cu e atletanan Arubano por a participa na e weganan olimpico representando nan propio isla, esta Aruba. Un otro desaroyo importante pa e deporte Arubano, cual tambe como consecuencia di e cambio estatal na 1986 ta cu entrante 1986 Aruba a haya su propio federacionnan di deporte y esakinan awo padilanti ta independiente di e organisacionnan ruman deportivo cu ta pertenece na Antias Hulandes. E prome biaha cu e atletanan di pais Aruba a participa na e weganan olimpico como atleta di pais Aruba tabata na e Weganan Olimpico di Seoul na Sur Korea na 1988. Resumiendo: Aruba den tres ocasion, y esaki desde 1952 tabata tin atleta cu a participa na e weganan olimpico cu den e tempo ey a cay bou auspicio di Nederlands Antilliaans Olympisch Comité y desde 1988 Aruba bou auspicio di Comite Olimpico Arubano a participa na 8 weganan olimpico. E Weganan Olimpico di 1988 tabata e prome wega olimpico, despues di status aparte, cu Aruba como pais a participa aden. Te cu e Olimpiada di Rio un total di 46 atleta a participa na e eventonan aki. Te cu awo Aruba no a logra gana un medaya.