Atleta Shanayah Howell a firma su beca Olimpico esaki como parti di su preparacion pa Tokyo 2020.
Despues cu siman pasa, Shanayah a firma su aplicacion pa ricibi un beca Olimpico, awe diamars e atleta elite di BMX a firma den forma oficial e beca Olimpico. Mainta na e cede di Comite Olimpico Arubano, e directiva di COA hunto cu e Direccion Tecnico a firma cu e atleta elite Shanayah Howell cu awor tambe ta forma parti di e atletanan cu e keda escohi anteriormente. Howell a firma e Beca Olimpico pa cu e preparacion pa e Weganan Olimpico Tokyo 2020.
Un beca Olimpico tin como meta pa duna un atleta apoyo di e nivel mas halto, pa asina e por prepara su mes miho y trata di logra un clasificacion pa Weganan Olimpico. Cu e apoyo aki e atleta tin acceso na facilidadnan di entrenamento superior, na entrenadonan specialisa y por participa na mas competencia clasificatorio.
Mirando e aprobacion di IOC pa otorga na e nos atletanan un beca Olimpico pa Tokyo 2020 ta un logro super grandi pa nos atletanan como parti di nan desaroyo deportivo y un logro grandi pa deporte Arubano. E beca ta yuda cubri un parti di e gastonan envolvi cu e preparacion ta trece cun’e.
Staf y personal di COA ta desea e atleta Shanayah Howell tur clase di exito y ta spera cu e atleta lo sa di haci bon uzo di e oportunidad aki, y cu e lo produci e resultadonan cu tanto nos ta anhela.
