News

Jorge (Gochi) Brion (1933 – 2005)

Futbol

E trahado di Lago Gochi Brion na 1952 — Foto for di Aruba Esso News

Jorge Brion miho conoci como Gochi Brion tabata un di futbolistanan Arubano cu a hunga den e seleccion Antiano den posicion di rechtsbinnen den e partido contra Turkia na e Weganan Olimpico na Helsinki na 1952. Cu su 19 aña e tabata e tempo ey e hungado di mas hoben den e team di Antias Hulandes. “Mi ta kere cu e olimpiada aki tabata mi mayor experiencia y logro den mi carera futbolistico, pasobra si mi mira awor con nos futbol ta, compara cu antes, mi no tin gana mes di papia”, segun Gochi. Gochi a lanta den e bario di Socotoro na Playa. Den su biografia e ta bisa: “Mi tabatin apenas 5 pa 6 aña, cu na cas mi a cuminsa scop bala di mea y den bes en cuando rond di cas, cu mi amigonan eybanda. Na scol, den cada ora liber, nos tabata core tras di un bala di spons, y bo mes sa, cu na tal ocasion bo mester hala hopi di e muchanan ey for di bo curpa”. Segun su ruman muhe Lica Brion, Gochi semper a hunga pa e team di su bario Socotoro, aunke bou diferente nomber p.e. Duivels van Oranjestad (D.V.O.), Boca Juniors y Aruba Jrs. Pa Duivels van Oranjestad y Boca Juniors el a hunga di 1945 pa 1948. Na aña 1949 el a cuminsa hunga pa Aruba Jrs. Esaki el a haci te cu 1962 como midvoor pa su ekipo Aruba Jrs. Na aña 1962 su carera di futbol competitivo hungando den hoofdklas a termina y manera nan sa bisa el a colga su sapatonan di bala.

E futbolista Gochi Brion na 1952 — Foto for di Aruba Esso News

Na aña 1949 el a bay cu Aruba Jrs. hunga bala na Corsou na ocasion di e apertura di e stadion di SUBT y na aña 1950 nan a bay Surnam pa participa na varios encuentrofutbolistico. Despues di e Weganan Olimpico di Helsinki na 1952 dos club di futbol profesional Hulandes a mustra interes den dje. El a haya oportunidad pa hunga bala den e division di honor Hulandes cu un di ekiponan aki (Blauw Wit di Amsterdam), pero despues di un try-out (hunto cu Doc Williams) di algun luna na tera friu el a dicidi di regresa su pais pa cumpli cu su trabou. Den e mesun temporada el a haya tambe otro ofertanan pa hunga pa e ekiponan Millonarios di Colombia y Danubio di Venezuela, cual ofertanan tambe el a rechasa. Gochi a hunga varios bes pafo di Aruba pa su club Aruba Jrs. of cu e seleccion di Antias Hulandes of cu e seleccion di Aruba. Por ehempel, na 1953 el a bay cu seleccion di Aruba hunga bala na Surnam, e biaha aki na ocasion di e apertura di e stadion na Surnam. Na 1955, den Campeonato di CCCF 1955 na Tegucigalpa na Honduras, Gochi a participa cu e seleccion di Aruba den e torneo aki. “Aki mi ta corda con mi a score un penalty contra e portero Hato (di Corsou), y asina ser e unico Antiano cu por a bora su net denexterior”, segun e ta conta den su biografia. E Campeonato di CCCF 1957 na Willemstad na Corsou: Gochi a hunga den e weganan di amistad cu a tuma luga na Oranjestad: Aruba-Haiti 3-1 y e di dos partido Aruba- Haiti 2-2. Na 1958 el a hunga cu e seleccion di Aruba den un partido contra Venezuela. Na 1959 el a hunga cu su team Aruba Jrs. contra San Salvador. Despues di un bunita y impresionante carera como futbolista cu su team Aruba Jrs. el a sigui hunga futbol cu e team di veterano. Fuera di tabata un futbolista talentoso, e tabata un hungado di tafeltennis y un coredo di distancia largo y cortico.
Tambe e tabata hungado di e team veterano di softball Extra Aruba Sluggers27, hungado di basketball pa Aruba Jrs., despues coach di e teamnan di basketball di Aruba Jrs. di hende homber y di hende muhe, tambe e tabata miembro di directiva di Aruba Jrs. y referee di basketball.

Gochi Brion na Surnam na 1953 — Foto di L. Brion

Related Articles

Back to top button