News

Juan Briezen (1928 – 2007)

Futbol

Juan Briezen den e programa di television Profil di siman — Foto saca for di Profil di siman, programa di television produci pa ATV, Cadochi Kock

Juan Briezen ta un di e futbolistanan Arubano den e seleccion di Antias Hulandes kende a hunga den posicion di midvoor den e partido contra Turkia durante e Weganan Olimpico di Helsinki, na 1952. Aki el a hinca e unico gol pa su ekipo. Cu un paso perfecto di Janny Brokke, Juan Briezen a kop na e di 82 minuut di wega e bala den gol. E partido a sali 2-1 pa Turkia y Antias Hulandes a keda elimina for di e campeonato di futbol di e weganan olimpico y Juan Briezen a skirbi historia futbolistico y olimpico. Juan a hunga tambe den mayoria di e weganan di fogueo cu Antias Hulandes a hunga na Hulanda y Francia prome cu a sali pa Helsinki.

Juan Briezen na banda drechi — Foto saca for di Profil di siman, programa di television produci pa ATV, Cadochi Kock

Juan a lanta na San Nicolas den e bario di Weg Fontein y a cuminsa hunga bala competitivo na 1942 cu e club Vulcanus, y cu Torpedo na 1944. For di 1944 te cu 1951 el a hunga pa San Nicolas Juniors y for di 1952 te cu 1956 cu Aruba Jrs. Despues el a hunga como veterano cu e club Deportivo. Juan ta wordo considera como un di e miho futbolistanan cu Aruba a yega di conoce. Hopi tempran den Juan su carera futbolistico Aruba Jrs. di e bario di Socotoro na Playa tabata interesa pa e bin hunga bala pa nan. Corsou tambe tabata mustra interes. Juan a scoge pa Aruba Jrs. E team di bala di Aruba Jrs. e temponan aya tabata un di e top teamnan den e hoofdklas di Aruba, kende cuater biaha a logra di bira campeon di Aruba. Juan a conta: cu e temponan aya no ta asina asina bo por bay hunga pa un otro club cu no ta di bo bario. Bo mester tin por lo menos e permiso di bo mayornan pa por haci esaki. Den caso di Juan su incorporacion den su team nobo di Playa y den e team di bond no a bay di e facil ey p’e, segun e ta conta. Pero Juan tabata un futbolista interesa pa hunga bala y nada otro y pronto e por a demostra su talentonan futbolistico e ora ey tambe pa su club Aruba Jrs. y den team di bond. Juan tabata un maestro den dribbel cu e bala (pasa un of mas contrincante). Su so por a hinca un gol despues di a pasa diferente hungado, a wordo bisa di dje. Pa su tempo e forma di hunga bala hopi individualista aki tabata comun y coriente den e futbol Latino Americano y di Aruba. Traha un bunita combinacion y haci di futbol e berdadero teamsport cu basicamente e sport aki ta, no tabata semper regla. Un plan di wega (strategia y tactica) cu ta un exigencia den e futbol moderno ta algo cu a bin mas despues den e futbol den parti di e hemisferio aki. E asina yama ‘futbol total’ cu e Hulandesnan a introduci den añanan sesenta y setenta bou di e liderazgo di e legendario ‘De General’ Rinus Michels y poni den practica p’e genio futbolistico Johan Cruijf y su compañeronan di ekipo a revulociona y a perfecciona ainda mas e futbol moderno.

E golfista Juan Briezen — Foto saca for di Profil di siman, programa di television produci pa ATV, Cadochi Kock

Juan a hunga diferente biaha cu e seleccion di Antias Hulandes (campeonatonan di CCCF y e CAC Games) y despues cu e seleccion di Aruba den e campeonatonan di CCCF y torneonan interinsular. Na 1955 Juan a hunga su ultimo partido internacional importante cu tabata e Campeonato di CCCF na Honduras. Despues di su carera como futbolista el a bira entrenado di futbol y a haci esaki pa hopi aña. Hopi tabata elogie pa su trankilidad pero mas ainda pa su experticio como entrenado (Club Estrella, RCA, e seleccion di bond y e seleccion Antiano). Juan tabata tambe un bon golfista. El a practica e deporte di golf for di e añanan cincuenta y sesenta di siglo pasa te cu na un edad halto. Pa hopi aña Juan tabata miembro di maneho di Lago Sport Park y miembro di maneho di AVB. Cu su fayecimento na 2007 Aruba a perde un yiu di tera grandi cu a aporta hopi pa e deporte di e futbol Antiano y Arubano y un deportista olimpico ehemplar Den e CAC Games na aña 1950 Juan Briezen a forma parti di e seleccion di Antias Hulandes. Esaki tabata e di dos biaha cu Antias Hulandes a participa na e campeonato aki y esaki a sosode bou auspicio di Nederlands Antilliaans Olympisch Comité. Na 1950 Antias Hulandes a bira cu nan seleccion di futbol pa e prome biaha den su historia campeon di e CAC Games cu tabata alabes nan ticket pa participa na e Weganan Olimpico di 1952 na Helsinki.

E futbolista Juan Briezen na 1952 — Foto for di Aruba EssoNews

Den e Campeonato di CCCF di 1953 na San Jose, Costa Rica Juan, kende a milita pa Antias Hulandes, a hunga den tres di e total di seis partido. Den e partido contra Guatemala el a score pa Antias Hulandes, tablando asina e partido 1-1 cu tambe ta e score final di e partido. Tambe el a hunga den e partido contra Costa Rica, aki Costa Rica a gana 1-0. El a hunga tambe den e partido contra Honduras cu nan a gana 4-32425 . Na aña 1955 den e di 7 Campeonato di CCCF na Tegucigalpa, aya na Honduras Juan Briezen, formando parti di e seleccion di Aruba a hunga den dos partido, unda cu Costa Rica ta gana Aruba 3-2. Den e wega aki el a score un gol. Su di dos partido cu el a hunga tabata e partido Aruba-Corsou, cu a caba cu e score di 1-2.

Na aña 1962 Juan Briezen tabata e asistent trainer di e ekipo di Antias Hulandes cu a bira campeon di e CAC Games cu a tuma luga na Kingston na Jamaica. Aki e futbolistanan Arubano (Edwin Dirksz, Candi Wernet, Ange Perez, Damaso Werleman, Toribio Briezen, Benny Geerman, Benny Brete, Yubi Richardson) cu a forma parti di e seleccion Antiano a hunga un papel importantisimo den e logro bunita aki. Tabata e di dos biaha cu e team di futbol di Antias Hulandes a bira campeon di e CAC Games y cu a ricibi como trofeo e medaya di oro pa esaki.

E trahado di Lago Juan Briezen na 1952 — Foto for di Aruba Esso News

Related Articles

Check Also
Close
Back to top button