Just ta keda cortico

Just van Aanholt ta keda cortico di un posicion riba e podium

E atleta di vela, Just van Aanholt a keda net cortico di un posicion riba podium apesar di gana su ultimo careda awe aki na Encarnacion y keda net na dos punto di e 3er lugar.

Riba e ultimo dia di competencia, Just van Aanholt a yega den un bon posicion pa bataya pa un posicion riba podium cu solamente algun punto di diferencia entre 3er, 4o y 5to lugar. Despues di 5 dia di competencia y diferente posicion den 8 careda, Just ta logra keda di 2do lugar den e prome careda. Den di dos careda ta keda na di 6 lugar y den e ultimo careda di competencia ta gana e careda pero no tabata suficiente pa dun’e su medaya di bronce den e Weganan Suramericano Asuncion 2022.

Mas cu claro un tremendo prestacion di parti di e atleta Van Aanholt den ILCA 7 cu progreso continuo durante siman, experienciando diferente tempo. Di parti Comite Olimpico Arubano nos ta sumamente orguyoso di e prestacion di e atleta hunto cu su coach Cor van Aanholt durante Asuncion 2022.