Kamilah y Abigail Dammers den Top 8

Kamilah y Abigail Dammers den Top 8 riba e prome dia di competencia individual na e Weganan Suramericano Asuncion 2022.

Riba e prome dia di e competencia di bowling individual, nos bolicheronan Kamilah y Abigail Dammers a haci loke a ser spera di nan. Ocupa un posicion faborabel drentando e ultimo seis weganan diaranzon. E dos atletanan elite di bowling a hunga un wega stabil y a keda constant den e top 8 cu a lo largo ta esnan cu lo clasifica pa e buelta final despues di 12 wega hunga. Mas cu claro lo mester ahusta y mira con lo ehecuta e “gameplan” pa majan ora hunga e siguiente 6 ronda nan. Diaranzon mes lo termina e cu e competencia individual unda lo hunga e buelta di 8 sigui pa e 4 mihornan den e semi-final y e 2 mihornan den e gran final. Por ultimo lo reparti e medayanan den Duo y Single den e compleho Strike Bowling na Paraguay.

Pa loke ta e resultado riba e prome dia despues di 6 wega nos por mira cu Kamilah Dammers ta na di 1 lugar cu 1308 punto y un promedio di 218.0 mientras Abigail Dammers ta ocupa un di 6 lugar cu 1220 punto tirando un promedio di 203.3

No tin duda cu Aruba completo lo ta pendiente diaranzon mirando e bon prestacion di Kamilah y Abigail Dammers aki na Asuncion, Paraguay unda cu ya caba Aruba a logra su mihor resultado den historia di e Weganan Odesur.

Hopi exito majan Kam, Abi y coach Chris