News

Lucas (Nunchi) Hernandez (1931 – 2005)

Futbol

Nunchi Hernandez na 1953, foto saca prome cu a sali pa Costa Rica pa hunga bala aya — Foto di famia Helder

Lucas Hernandez miho conoci como Nunchi a forma parti di e seleccion di Antias Hulandes cu a bay e Weganan Olimpico na Helsinki na 1952 como e reserve keeper. Na un dado momento den e wega contra
Turkia el a reemplasa e keeper Ergilio Hato di Corsou. Aki el a laga un impresion hopi bon di su calidad como keeper atras. Nunchi tabata un di e miho keepernan cu Aruba y Antias Hulandes a yega di conoce. El a
hunga den mayoria di e weganan di fogueo cu Antias Hulandes a hunga na Hulanda y Francia prome cu a sali pa Helsinki. Den e partidonan aki el a haci tambe un tremendo trabou.

Nunchi a lanta den e bario di Rancho na Playa. E tabata e keeper estelar di Aruba Jrs. pa hopi aña durante e añanan cincuenta. Na aña 1953 el a haya un oferta pa hunga como profesional pa e club La Salle di Venezuela cual oferta el a rechasa. Na 1960 el a para den gol pa Club Estrella di Sta. Cruz. Poco ta conoci di dje awendia. El a bay biba na Venezuela despues di su carera futbolistico na Aruba. Na 2005 el a fayece na Punto Fijo na Venezuela.
Den e Campeonato di CCCF na San Jose, Costa Rica na 1953 Nunchi a hunga como keeper pa e team di Antias Hulandes den total 5 partido (contra Guatemala, Nicaragua, Panama, Costa Rica y Honduras) di e total di e 6 weganan cu a wordo hunga pa Antias Hulandes den e campeonato aki: Guatemala-Antias Hulandes 1-1, Antias Hulandes-Nicaragua 8-0, Panama-Antias Hulandes 2-4, Costa Rica-Antias Hulandes 1-0, Antias Hulandes-Honduras 3-4.

Related Articles

Check Also
Close
Back to top button