Atleta Mack van den Eerenbeemt a firma su beca Olimpico esaki como su preparacion pa Tokyo 2020.
Dos luna pasa Comite Olimpico Internacional a otorga un Beca Olimpico na 8 di nos atletanan elite di Aruba. Algun di nan presente na Aruba a firma e Beca Olimpico pa cu nan preparacion pa e Weganan Olimpico Tokyo 2020. Diaranzon mainta e directiva di COA hunto cu e Direccion Tecnico a firma cu e atleta elite di vela, Mack van den Eerenbeemt di sailing cu tambe ta forma parti di e 8 atletanan cu e keda escohi.
Un beca Olimpico tin como meta pa duna un atleta apoyo di e nivel mas halto, pa asina e por prepara su mes miho y trata di logra un clasificacion pa Weganan Olimpico. Cu e apoyo aki e atleta tin acceso na facilidadnan di entrenamento superior, na entrenadonan specialisa y por participa na mas competencia clasificatorio.
Mirando e aprobacion di IOC pa otorga na e ocho atletanan un beca Olimpico pa Tokyo 2020 ta un logro super grandi pa nos atletanan y un logro grandi pa deporte Arubano.
Mayoria di e atletanan mescos ta e caso di Mack van den Eerenbemt ta biba, studia y eherce nan deporte den exterior, nan lo sigui entrena den exterior, como parti di nan desaroyo deportivo. E beca ta yuda cubri un parti di e gastonan envolvi cu e preparacion ta trece cun’e. Di aki bandi COA ta desea e atleta Mack van den Eerenbeemt tur clase di exito y ta spera cu e atleta lo sa di haci bon uzo di e oportunidad aki, y cu e lo produci e resultadonan cu tanto nos ta anhela.
