Barranquilla2018News

Mikel ta hasi historia

Prome medaya pa Aruba na Barranquilla

Mikel Schreuders ta haci historia logrando un medaya di Plata pa Aruba den e Weganan Centro Americano y del Caribe Barranquilla 2018.

Cu su tempo marca di 49.17, Mikel Schreuders ta clasifica automaticamente cu tempo A pa e Weganan Panamericano Lima Peru 2019. Es mas Mikel ta bira e prome landado di Aruba cu ta gana un medaya pa e deporte landamento. Nunca antes un atleta di landamento a gana un medaya den e Weganan CAC. Cuater aña pasa na Veracruz, Allyson Ponson tabata asina serca pero ta finalisa na un di 4 lugar den e 100m estilo liber. Na banda di esaki, Mikel ta kibra e record nacional den 100m estilo liber.

E mainta na Barranquilla, Mikel ta landa 49.80 cual tabata e di 4 miho tempo, sinembargo anochi den e final, e hoben Arubano studiando na Merca ta remata duro den e ultimo meternan pa asina finalisa na un di dos lugar bon pa e medaya di Plata.

Mas cu claro e delegacion completo tabata super contento y orguyoso di e prestacion unico aki. E medaya aki ta uno cu Mikel a traha duro pe. Dos siman atras tambe e la logra medaya di Plata den e CCCAN 2018 teni na Aruba mes. Medaya di Oro na Barranquilla a bay pa e Dyllan Carter di Trinidad & Tobago.

Pabien Mikel. Aruba no por ta mas orguyoso dibo.

Related Articles

Back to top button