News

Nicole ta postula su mes pa e Vice-Presidente

E ta cla pa un reto nobo

Secretaria General di Comite Olimpico Arubano, Nicole Hoevertsz a postula su mes pa e puesto di Vice-Presidente di Comite Olimpico Internacional.
Miembro di Comite Ejecutivo di Comite Olimpico Internacional y alaves Secretaria General di Comite Olimpico Arubano, Nicole Hoevertsz, ta cla pa un otro reto den e organisacion deportivo cu ta encarga cu entre otro Weganan Olimpico cu e siman aki ta inicia na Tokyo, Japon.
Den fin di siman, Nicole a confirma su candidatura pa e puesto di Vice Presidente di IOC. E puesto aki a bira vacante awor cu e Vice Presidente actual, Anita DeFrantz, ta yegando e final di su termino.
Hoevertsz ta e unico candidata pa e posicion di vice-presidente, debi cu ningun otro Miembro di IOC a opta pa postula nan mes pa e puesto.
Nicole Hoevertsz ta formando parti di IOC desde 2006 pero desde 4 aña pasa ta un miembro di Comite Ehecutivo.
Presidente Thomas Bach tin un confiansa grandi den Hoevertsz pa cual ya caba ela fungi den rolnan sumamente importante, entre otro Presidente di e Comision di Coordinacion pa e Weganan Olimpico di Los Angeles 2028. E ta tambe vicepresidente di e Comision di Coordinacion pa e Weganan Olimpico di Paris 2024.
Nicole tambe tabata presidi e Comision di Atletanan Olimpico di Rusia cu, relaciona cu e escandalo di doping den cua e autoridadnan gubernamental di Rusia tabata envolvi, tabata tin na su encargo pa finalisa reglanan y regulacion pa participacion di e atletanan den Weganan Olimpico di Invierno na PyeongChang 2018.
Nos di Comite Olimpico Arubano y comunidad di Aruba ta desea Nicole tur clase di exito den su postulacion, sperando cu e lo ta exitoso.
Tags

Related Articles

Close